Intodelh duh thalaiten ZPM-ah beiseina nei sang – Lalthansanga

Mizoram thalai intodelh duhten ZPM ah beiseina an nei sang hle tih ZPM vice president Lalthansanga chuan a sawi.
Thawhtannia an party office-a inkhawmah ZPM vice president chuan ei leh bara intodelh sawi thin chu, tuna kan ram dinhmun thlir chuan kan intodelh lo em em tih sawiin, “Thalai tam tak ram pawnah eizawng tura an chhuah a ngai a, hei hian kan ram ei leh bar dinhmun chhiat zia a tarlang chiang hle. Kan thalaite rilru a harh mek a, intodelh duhna an nei lian hle a, he an duhna tihlawhtling tur hian ZPM ah beiseina sang tak an nei a ni. Kan mithiamte pawhin an thiamnate a tak taka an hman theihna turin ZPM an rawn pan khawm mek zel a ni,” a ti.
Vawiin thlenga kan ram enkawl tawhtuten an theihtawp an chhuah ve thin a, kum 1966 ah hnam movement a lo awm ve tawh a, hun lokal zelah ram hrang hranga Zofate insuihkhawm a, Mizoram chu kan Jerusalem khawpuia siam turin hmalakna te a awm chho ta zel tih Lalthansanga hian a sawi a. Chumi atanga kum 50 chuang a liam hnu in, kan ram hruaitu hmasaten theihtawpa an lo beih tawhte tihlawhlting turin ZPM chuan tih tur pawimawh tak an nei tih a sawi. “Mipui ni loa keimahni kan indah hmasak chuan chunglam hian mal min sawm dawn lo,” a ti.