Hnahthial bawrhsap pisa hawng

Hnahthial district bawrhsap pisapui building leh District Urban Development Officer (DUDO) building thar chu South Tuipui bialtu MLA, minister Dr R Lalthangliana’n a hawng.
Minister chuan kum 2019 atanga function tan district thar pathum – Saitual, Khawzawl leh Hnahthial zinga bawrhsap pisa hawng hmasa ber an ni chu a lawmpui tih a sawi a. Office building tha tak neiin staff la tlem hle mah se, reiloteah luah khat vek turin tan an la dawn tih a sawi. Chutihrualin district-in a ken tel department hrang hranga officer leh staff te, office la nei ve lo te pawh thleng thiam a, siamrem thiam turin bawrhsap leh a thawhpuite a ngen.
UD&PA hnuaia DUDO chu Hnahthial khawpui tihchangtlunna kawngah a pawimawh hle, tiin, an department hnuaia hamthatna hailuh kawngah tan lakpui turin a ngen.
Bawrhsap office building sakna sum hi Special Assistance to State for Capital Expenditure (SASCI) atanga hmuh niin, 2021 August 27-a sak tan, kumin August 31-a zawh a ni. Work order amount chu Rs. 9,08,93,558 a ni a, sum sen hi cheng vaibelchhe 10 hu a ni. DUDO building hi SEDP sum atangin nuai 70 senga sak a ni a, 2021 February 16-a sak tan niin, kumin June 22 khan zawh a ni.