Hnalak dan duh lo zirlai pawlin an
thil phut hmuh hma nawr an tum
Assembly Secretariat-a hna lak danah induhsakna uchuak a awm nia ngaiin zirlai pawl chuan hna lak cancel phutin Zirtawpni chawhma khan Assembly Secretariat kawtah an pungkhawm a. An thil phut tihhlawhtlin a la nih loh zel chuan karleh Thawhtanni hian a hmun ngaiah punkhawm leh an tum.
Mizoram Legislative Assembly Secretariat-ah hian tunhnaiah hna 11 lak a ni a, he thilah hian Assembly speaker leh Secretariat hotuten an duhsak zawng an thun deuh vek nia hria in Mizo Zirlai Pawl leh Mizo Students’ Union chuan hna lak hi cancel a, recruitment rules thar hnuaia hna hi lak that an phut a ni. An phut leh beisei ang hi July 6 ralhma thlenga tih hlawhtlin a nih loh avangin July 7 zing khan Assembly Secretariat thawktute pisa kai tur dan an rawt a ni.
The Aizawl Post thudawn danin Assembly Secretariat-a hotute chu July 7 hian pisa an kai loa, thawktu dangte chu zirlai pawl ten dan an tum tan hma daiha kal tura hriattir an ni thung. Dan leh thupek kenkawh tuma duty police leh pisa kai tur dan tum zirlai pawlte inkarah innawr buai ngai thil thleng a awm loa, zirlai pawlte hian Assembly Secretariat kawtah an thil phut auchhuahpuiin hun an hmang.
MZP president Lalnunmawia Pautu chuan Assembly Secretariat lam insawithiamna chu an pawmpui loa, he hnalakah hian a tirah tum lawk sa neiin kalpui a ni tih an chian thu a sawi. An phut anga an cancel lo a nih chuan a tawp thlenga dodal an tum tih a sawi. “Kan ngenna hi an ngaipawimawh lo a nih chuan he Secretariat hi kan luh chhuah dawn. Kan au aw min ngaihthlak sak turin speaker leh Assembly Secretariat hotute kan ngen a ni,” a ti.
Pungkhawmte hian resolution pass in, Mizoram Legislative Assembly Secretariat-a hna lak cancel a, recruitment rules thar hnuaiah lak thar nise, an ti. Hnalak hi cancel a nih hma chuan hma lak chhunzawm zel an ti a ni.
Zirlai pawl hruaitute hi chief minister Zoramthanga chuan a office-ah lengah sawmin, hemi chungchang hi an sawiho a. Zirlai pawl hian Assembly Secretariat-a tunhnaia post 11 atana hna lak chungchanga lungawilohna an neih te an sawi bakah Recruitment Rules (1995) chu a hlui tawh avangin ennawn ngai nia an hriat thu an thlen a ni.
Chief minister hian zirtlai pawlte lungawi lohna ziaka thlen tura a ngen angin ziakin an duhdan an thlen a. Zirtawpni chawhnu khan zirlai pawlte hi thukhawm lehnghalin an thil phut a hlawhtlin hma chuna hmalak zel nise, tiin, lungawi lohna hi lantir chhunzawm a, kawng zawh leh total bandh thlenga tintuahin, July 10, Thawhtanni zing dar 8.30 hian Assembly Secretariat kawta punkhawm leh an rel.
-- Advertisement --
Zirlai pawlte sawi dan:
# Mizoram Legislative Assembly Secretariat-a thawktu 11 lak tharah mi 9 chu speaker leh commissioner & secretary nilai leh kalchhuak ta te vua leh vang an ni.
# Translator-a lak Lalramliani Sailo chu Assembly commissioner hlui Ngurthanzuala Sailo fanu
# Assistant-a lak Melissa Lalremruati chu Assembly speaker monu
# UDC-a lak Samuel Lalremruata Zote chu commissioner & secretary nilai Lalhmahruaia Zote fapa
# LDC-a lak mi 6 – Christina Lalhmunmawii chu speaker private secretary nau, Vanlalruati Sailo chu sSpeaker Lalrinliana Sailo fanu, Lalmuankima Sailo chu speaker personal assistant nilai, Lalhmangaihzuali Khawlhring chu speaker thianpa fanu, H Rebecca VL Ruatsangi chu speaker tunu, K Lalhruaitluanga chu speaker campaigner.