Dr K Beichhua BJP-ah lut dawn

Minister hlui Dr K Beichhua, Siaha bialtu MLA chuan BJP a zawm dawn a, mahse inthlan puan huna luh a tum.
“BJP ka zawm ang a. Mahse tunah chuan ka la zawm thei lo a, election puan hnuah ka zawm ang,” tiin The Aizawl Post a hrilh.
“Siaha biala ding turin ka zawm ang,” tiin inthlanpui lo awm turah a bial ngaiah BJP candidate a ni dawn tih a sawi a, chu chu an tifel tawh tih sawiin, Delhi-ah BJP hruaitute nen pawh an inbia tih a sawi.
BJP a zawm hunah party-ah chanvo a chang ang em tih a ngaihtuah lo niin a sawi a, “Party-ah post ka chelh ang em tih lam ka rilruah a awm lo a, chelh pawh ka chelh ka ring lo,” a ti.
Siaha bial-a MNF ticket-a tling Dr K Beichhua hi nikum kum tawpah minister atanga chawlhtir a ni a, kumin kum tir lamah MNF atanga chhuahtir a ni bawk. Chumi hnuah Siaha district-a MNF atangin amah zuitu engemaw zat an chhuak a, a then chuan BJP an zawm tawh.
Amah zui chhuaktute hi BJP-ah a luhpui vek thei ang em tih chungchangah, 100% chu a theih lohvah a ngaih thu a sawi a, chutih rual chuan MNF-a la awm, BJP a zawm huna zui tur engemaw zat an awm tih sawiin, “La chhuak lo engemaw zat an awm a, min nghak a. Party ka zawm hunah anni nen hian kan inthurual ang,” a ti.
Independent MLA a nih thu a sawi a, party a zawm loh avangin MLA atanga chawlhtir theih a nih loh thu sawiin, tuna ZPM MLA-te hi a nihna takah chuan independent MLA an ni a, mahse ZPM an ni a, chawlhtir an ni lo tiin a sawi.
Dr Beichhua hian bial a fang mek a, mipui chezia a enin a hlim tih a sawi a, “Malsawmna dawng leh turah kan inngai,” a ti.
Dr Beichhua hian Ningani khan Siaha Press Club-ah thuthar lakhawmtute kawmin BJP zawm a tum thu hi a sawi.