Hnam martar-ten hnam an tizahawm – Tawnluia

Mizo hnam tana martar-ten hnam an tih zahawmna kha thangtharte ah hnam inlungrualna thlen zeltu nise a duh tih MNF senior vice president Tawnluia chuan a sawi.MNF Thalai Hqrs. huaihawta September 20 – ‘Martar-te Ni’ puala Thawhlehnia Aizawla two wheeler rally neih a hmanpuinaah Tawnluia chuan hnam pasaltha-ten ram leh hnam tan an thawh theih tawk thawk zoin thangtharte chhunzawm atana an hlan chu thangtharten engtin nge kan chhan dawn, tih zawtin, Mizoram tan kawng hnih khat tala inhlan thar leh turin a sawm
“Martar-te kha kan hnam tana meichher kengtu an ni a. Thangtharten ram leh hnam tana ke kan penna kawngah kawng kan zawh sual dawn pawhin an meichher eng ken hi hrerengin, ram leh hnam tan chakna thar kan neih theih nan hmang thin ang u. Hnam martar-te khan kan hnam an ti zahawm a; thangtharte ah inpumpekna leh lungrualna thlen zel se ka duh,” a ti.
Hnam martar-te chu Mizo hnamin zalenna kan neih a, awpbehna atanga zalenna kan hmuh theihna atana beitu leh an nunna hlantute an ni tih MNF hruaitu hian a sawi a. Ram leh hnam an hmangaih avanga an mahni inphatsana an nunna an hlan ang hian, ram leh hnam chhan turin thalaite chu an rilru sawhnghet deuh deuh tur leh martar-te ngaihhlut nachang hre turin a chah tih a sawi.
Mizorama pawl leh political party hrang hrang bakah kohhranten remna a awm theihna atan theihtawp chhuaha hma an lak thu Tawnluia hian sawiin, Mizoram mipui duh dan angin remna siam a ni ta tih a sawi a. MNF chuan zalenna sual a peih tawh loh vang niloin, mipui duh dan ang zawka remna siam an ni tih a sawi. “Zohnahthlakte rorelna khat hnuaia awmtir hi MNF policy a la ni reng,” a ti.