Hnam tobul chhuichhuah hi kan policy pakhatah kan dah – Chief minister

Hnam tobul chhuichhuah hi
kan policy pakhatah kan dah
– Chief minister
MIzo history chhui ngai a la tam a, thangtharten chonaah ngai se an duh rualin, sawrkar pawhin hnam tobul chhuichhuah hi policy pakhatah an dah tih chief minister Lalduhoma chuan a sawi.
Dr Selbuanga Foundation (Sel Foundation) bultuma siam, mithiam paliten zirchianna behchhana ziah, “Mizo History leh Sailo Lal Ropuite: Vandula leh Ropuiliani” tih lehkhabu chu Inrinni khan chief minister hian a tlangzarh a. Mizote hi hnam naupang anga sawi mai chang awm thin mah se, kan pi leh pute sulhnu kan hmuh atang hian hnam naupang kan nih loh zia a langa a hriat thu a sawi. An hmun hlui ropui tak tak, an sakhua, an themthiam thil dangte atang hian hnam upa leh hriatna thuk tak nei kan ni zawk nia sawiin, “Ziak leh chhiar kan thiam har avang leh kan history kan hriat thui loh avangin hnam naupang emaw kan inti ta mai niin ka hria,” a ti.
Vawiina kan history hriat tam tak pawh min awptu Sapho lo chhinchhiah a ni a, anni’n min awp hma lam hun chhuichhuah ngai kan la ngah tih sawiin, hei hi thangtharten chonaah ngai se, a tuimi leh history zir mithiamten ngaihvenin, sawrkar pawhin hnam tobul chhuichhuah chu a policy pakhatah a dah a, a tul angin hma an la zel dawn tih a sawi a ni.
Selesih sangsarih atanga an darh hnua Mizoram chhim lam ram bawha inzar pharh lal Rolura thlahte chanchin chhuizuina lehkhabu tha tak kan neih belh ta leh, a bikin lal Vandula leh a nupui Ropuiliani, India freedom fighter ropui leh ngaihsanawm chanchin chhawp chhuah a ni chu a hlu zual tih Lalduhoma hian sawiin, “An ni chanchin hi India mipui pawhin min tuipui tial tial a, an hming kan lam ni apiangin kan inchhuang thin. Ropuiliani lem mawi tak hi Prime minister Narendra Modi ka lo pe tawh nghe nghe a. Ani pawhin a lo ngaihlu thiam hle. An phumna hmun thu ah inhnialna a awm tih kan hre theuh a, keini ang, engmah va hre thuk lem lo chuan an tu leh faten an hrechiang ber turah kan lo ngai a. Engtikah emaw chuan sawrkar pawmpui theih tur thutlukna a la awm ngei ka beisei,” a ti.
Lehkhabu tlangzarh tak hi Sel Foundation-in history lam zirthiam mi pali thawhpuia an buatsaih a ni a. A ziaktute hian history thuziak awm tawhsa leh tawngkaa thu inhlanchhawn an hmuh theih ang ang, Mizoram leh thenawm state Archive amite thlenga dapin, an thil hmuh leh hriat atangin ‘scientific research methodology’ hmangin lehkhabu hi an buatsaih a ni. Ropuiliani phumna dik zawk chhuichhuak turin DNA test an kalpui mek tih an sawi bawk.