Hnamdang sumdawn puite CYMA-in inchingfel turin ni 30 hun pe

Hnamdang sumdawn puite CYMA-in
inchingfel turin ni 30 hun pe
In sakna bungrua thenkhat dawr siama Mizo leh hnamdang inmawngzawmte chu tihtawp a nih theihna’n Central YMA chuan inchinfelna hun thla khat chhung a pe.
Thawhtanni zan khan Central YMA hian Aizawla in sakna bungrua – cement, iron rod, brick adt zuartu kokhawmin, hnamdang, Mizo hming hawha sumdawngte chungchang leh sumdawnna atana Mizoin hnamdang hnena an hming hawhtir thintute chungchang bakah iron rod size tling lo zawrh chungchang sawi ho a ni.
Central YMA president R Lalngheta chuan hun rei tak atang tawhin YMA chuan hnamdang mawngzawm puia sumdawngte hi an lo buaipui tawh tih sawiin, sum leh pai hlawkna um avangin Mizo tam takin kan hnam an hralh mek tih a sawi. Hetiang dapchhuah kawngah hian Central YMA chuan na takin hma a la dawn tih sawiin, “Kan ti mai mai dawn lo, a tul a nih chuan tharum pawh kan hmang ang. Vawiina helaia thu Central YMA hruaitute hian a tul a nih chuan kan hnam chhan nan tawrh hmasak kan huam,” a ti.
Tun atanga thla khat chhungin hetianga hnamdang mawngzawma sumdawngte hi inchingfel turin an ngen tih Central YMA hruaitu hian sawiin, “Zahah la loin, tlawmah la loin, kan mawngzawm puite i thlah ang u. Sum leh pai ringawt thlir loin, kan hnam damna tur min thlirsak rawh u,” a ti.
Central YMA vice president, Kumpuan Committee chairman ni bawk Lalhmachhuana chuan Central YMA-in hnamdang thurualpuia sumdawngte chungchangah kum 2016 atanga hma a lak tan thu a sawi a. Aizawl bawrhsap, SP leh AMC lamah an hmalakna report thehluh a nih thu te, tuna Aizawla cement leh iron rod zuar zinga dawr 40 vel chauh AMC permit nei an nih thu te, chu’ng zinga an permit dam phei chu mi tlemte an nih thu te sawiin, “Dan hnuaiah midang hminga sumdawn chu khap tlat a ni,” a ti.
Zemabawk atanga Kulikawn inkarah cement leh iron rod zawrhna dawr nghaktu zingah hnamdang hlir an nih thu leh dawr dang chu smart taka Mizoten an nghah thu a sawi a. Hetianga hnamdang thurualpuia sumdawngte list chu an nei tih a sawi a ni.
Aizawla hnamdang thurualpuia sumdawng nia hriat cement leh irod rod zuar dawr neitu mi 85 leh heng dawr awmna huamchhung YMA branch hruaitute kohkhawm niin an inkawm a ni.