Hnathawh chhung tawi chhuanlam atan kan hmang rei tawh – Larsap
Mizoramah ruahtui tlak tam avanga hnathawh hun chhung reilo chu a pumpelh dan zawng si loin chhuanlam atan hun rei tak atangin hman a ni tawh a, hmasawnna kawngah thanmawh bawk a ni tih larsap Dr Hari Babu Kambhampati chuan a sawi.
Zan khat riaka Khawzawl district tlawhtu larsap Dr Hari Babu Kambhampati hian Zirtawpni khan head of office-te, bank hotute, political party, kohhran leh tlawmngai pawl hruaitute a kawm a, PMAY (Urban) hamthatna dawngtu tlawhin a kawm bawk.
Khawzawl district bawrhsap CC Lalchhuangkima chuan district chanchin, centrally sponsored scheme kalpuia hmasawnna, a sawi a. SP Lalchhawnthanga’n venhimna kawnga police hnathawh bakah dan leh thupek kenkawh kawnga district dinhmun a sawi.
Larsap chuan kawngpui lai leh hmasawnna ruhrel khawih mekte chu a hun taka thawh zawh a pawimawh, tiin, “Project pakhat thawh rei lutuk avangin project tha tak tak tam tak kan chan thei a. Hetiang thil kan tih fo hian beneficiary-te chanvo kan hup bet tih kan hriat a ngai. Mizoramah hnathawh hunchhung a tawi tih hi kan hriatna a rei tawh a, he thil inbumro tir loh dan zawng si loa, chhuanlam atan kan hman reng hi a fuh lo a, hmasawnna kawngah thanmawh bawk a ni,” a ti.
Bawrhsap report-a tarlan danin, Khawzawl district hi 2019 August 12 khan siam a ni a. Village council 38 a awm a, urban town 3 leh rural village 26 awmin, 2011 census-ah mihring 36381 an cheng a, sex ratio hmeichhia za zela mipa 102.5 awm anga chhut a ni. 2021 April 1-a chhinchhiah danin literacy rate chu 96.64% a ni.
Central scheme thawh zingah PM Kisan hamthatna dawng thei loneitu 2674 an awm a, NABARD fund hmangin nizung chakna hmanga tuilakna khaw 7 chawm tur zawhfel niin, hengte hian mihring 10118, district chhung thingtlanga cheng 53.52% dawn a chawm. Kumin March-a zawh hman tura beisei hmarchhaka solar park project lian ber megawatt 20 pe chhuak thei tur Vankal Solar Park pawh Jawahar Lal Nehru National Solar Mission hnuaiah thawh mek a ni.
District chhungah bank branch 7 a awm a, December 2022 quarter tawp thleng khan bank-a pawisa dahluh leh lakchhuah inthauhna, credit deposit (CD) ratio chu 71.90% a ni.
Larsap hian khawpuia chengte tana in sak tanpuina scheme, (PMAY – U) hnuaia hamthatna dawngtu a tlawh a, scheme awmzia leh tangkainate a sawifiah a, an hmuh dan leh chhawr tangkai dante a zawt a ni.