Hnehna nen Canada-ah Verstappen kirleh

Monaco Grand Prix-ah lawmman semna dawhsan chuangkai zo loin paruknaah thleng daih mah se Pathianni Canadian Grand Prix-ah world champion Max Verstappen chuan a hum ngai luahkirin pakhatna a rawn ni chho leh ta a, season kal laia intlansiak vawikua awm tawhah vawiruk chakin driver standing-a a hmahruaina a sawhnghet leh sawt.
Red Bull chhuanvawr Verstappen hi tlankawng huh leh ro inpawlhah a tawp lam lap 10 chhunga car panga inbeihna hnehtu a ni a; safety-car chhuah hnu lap 11 la awma bul an tan that lehah a thiamna chhawrin hma a hruai a, a hnungah McLaren driver pahnih Lando Norris leh Oscar Piastri-te chu Mercedes car khalhtu pahnih George Russell leh Lewis Hamilton-te nen an inthlur ve bawk a, a tawp thlengin Verstappen a dingchang ta ber a ni.
A tir lam tlankawng huh leh ro an thlanthelh karah tum hnih ngawt Norris khan hma a hruai ve hman a, a hnuah Dutch driver-in a hmakhalh a, lawmman semna dawhsan erawh lawnkai zo ta thoin pahnihnaah a thleng.
Russell chuan kum hnih dawn thuak chhunga pole position a luah vawikhatnaah drama a thlen nual hma lap tir lam engemawti chhungin hma a hruai ve vuai hman a, lap thum tlan tur la awmah a team-mate Hamilton lehpelin podium hniam ber a luah ve bawk.
Palinaah Briton Hamilton thlengin, a hnungah McLaren khalhtu Piastri leh Fernando Alonso of Aston Martin an indawt.
Tun season-a vawiruk a chak tawh hmangin Verstappen khan Ferrari driver Charles Leclerc laka championship hma a hruaina chu point 56-ah a pawtkau a, Monaco Grand Prix-a pakhatna Leclerc hi Canada tlankawngah talbuaiin lap 43-ah race chhunzawm thei loin a tawpsan.
Chawlhkar hnih hnuah Formula One team-te Europe lamah an insuanlut leh tawh dawn a, Barcelona tlankawngah Spanish Grand Prix kan thlir ang a, chu mi hnuah Austria-in chhunzawmin, July ni 5-7 chhung khian Silverstone tlankawngah British Grand Prix kan thlirho leh dawn a ni.