James Vanlalringa Vairengte
-- Advertisement --
Ram hmasawnna tura tehfung pawimawh ber pakhat chu kawng tha neih hi a ni. Mizoram hian kawngpui kan nei tha lo hle a, Hmarchhak State zingah pawh a nei chhe ber pawl kan ni hial awm e. Hei tunhnaiah Vairengte – Sairang inkar kawngpui thlur li (4 Lane) a siam turin hma an la chho mek a ni a, heti ang kawngpui tha tak kan ramin kan nei ve tur hi a phurawmin, a vanneihthlak takzet a ni. He kawngpui siam turah hian a ram mipuite pawhin theihtawp chhuaha kan lo tawiawm ve hi kan tih tur a ni. Vairengte – Sairang kawng hi Mizoramin State pawn atanga kan chak lakluhna kawngpui pawimawh ber a ni a, harsatna awm miah lova lirthei (a lian a te) tlan pur pur theihna tur kawngpui zau nuam tak (4 Lane) an siam tur hi Mizoram tan hmasawnna mellung pawimawh tak a ni ngei ang. He 4 Lane hi siam zawh a nih hun chuan Mizoram Economy hmelhmang pawh nasa takin a ti danglam dawn a ni.
He 4 Lane kawng hi Ministry of Road Transport & Highway sum hmanga Bharatmala Pariyojana hnuaia thawh tur a ni a, hnathawktu tur (Executing Agency) hi NHIDCL te an ni. Vairengte – Sairang inkar kawng 4 Lane siam tur hi 90.25 kms a thui a ni a, he Project hi kum 3 chhunga zawh tura ruahman a ni. He kawng hi an siam zawh hunah chuan Aizawl – Vairengte inkar hi 30 kms laiin a hma aiin a tawi zawk dawn a, Aizawl – Vairengte hi darkar 2 chhung lekin a thlen theih tawh dawn a ni.
Kawng zau zawng tur : 4 Lane kawng hi Mizoramin kan vawi khat neihna tur a nih vangin a tam zawk chuan kan la hmelhriat lutuk lo mai thei a, chuvangin kawng an siam tur zau zawng / len zawng tur hi kan lo hriat ve hrim hrim hi a pawimawh awm e. A tlangpuiin 4 Lane National Highway an siam hian thlur khat hi 3.7 – 3.9 metres a zau a ni thin a, thlur li hi 14.8 – 15.6 metres a zau a ni tlangpui bawk. Tuna Vairengte – Sairang kawng 4 Lane an siam tur hi thlur 2 ve ve a kal tur a ni a, a laiah 2 metres a zau awmin, chu chuan thlur 2 ve ve te hi a daidang ang. Kawngpui thlur 2 zau zawng hi 7.5 metres ve ve tur a ni a, thlur khat zel hi 3.75 metres (12.375 feet) a zau a ni ang. Motor-in a rah tur chin kawngpui thlur li zau zawng hi 15 metres a ni. Kawngpui thlur 2 sir tawn tawnah hian Paved Shoulder 1.5 metres a awm ve ve anga, Earth Shoulder 1 metre ve ve awm bawkin, 0.5 metre Drain a awm ve ve bawk ang. Tichuan 4 Lane hian a pumpuiin 23 metres a zau a awh dawn tihna a nih chu.
Tuna 4 Lane kawng an siam tur hi zau tha pangngai tak tur a ni a, hmun danga 4 Lane kawng an siam te nena khaikhin pawhin a zahpuiawm hran loh hmel. He 4 Lane hi a ruala lirthei pali (4) insu buai miah lova tlan thei tura duan a ni a, an ruahman danah chuan kawng hi ngil leh chhuk chho awm lova a zal thei ang bera siam tur a ni bawk.
Kawng Laitu turte : Vairengte – Sairang kawng 4 Lane siam tur hi Package hrang hrang paruk(6) ah then a ni a, NHIDCL hnuaiah hian Construction Company hrang hrangten Tender chhangin Package tinah kawng laih hna hi an thawk dawn a ni. Package 3 : Vairengte – N.Chhimluang inkar a ni a, 14.85 kms niin Dhatarwal Company ten an thawk dawn a ni. Package 4 : N.Chhimluang – Gosen veng(Rengtekawn) inkar a ni a, 16.5 kms niin Shivalaya Company ten an thawk ang. Package 5 : Gosen veng – Thingdawl inkar a ni a, 18 kms niin RSK & MLN ten an thawk ang. Package 6 : Bualpui – Kawnpui inkar a ni a, 16.35 kms niin Pappu Prasad Company ten an thawk ang. Package 7 : Kawnpui – Mualkhang inkar a ni a, 13.65 kms niin Balaji Company ten an thawk ang. Package 8 : Mualkhang – Sairang inkar a ni a, 10.9 kms niin Dhatarwal Company ten an thawk ang.
Kawng lai tur Construction Company te hi an inbun fel vek tawh a, hna tan mai thei turin khawl chi hrang hrang nen an inchhawp rup tawh hlawm. Company thenkhat phei chu kum 2 hma lam atang tawh khan khawl nen Work Order nghakin an lo awm tawh a: nikhat lek pawh hnathawk lova an khawl a ding mai mai hi uiawm tham tak tur a ni. Heti leh chen hi hnathawk lovin an khawl te hi an ding tawh a, engzat tak sum hloh tawh ang i maw, chhut tham fe chu a ni ngei ang. Kum 2020 atang khan 4 Lane kawng hi lo lai tan tawh chu nise, tunah chuan 80 – 90 % lai an thawh zawh tawh a rinawm.
4 Lane Malsawmna : 4 Lane hian kawng hrang hrangin Zoram tan malsawmna a rawn thlen dawn a, chung (benefits & advantages) te chu kan sawi vek seng lovang, a then a zar chauh han tarlang ila :
i) Chhungkaw thahnem takin an ram leh thlai a tihchhiat man (zangnadawmna) sum engemawzat an dawng dawn a, an vuavang te tan pawh malsawmna a ni ngei ang. Hei hian chhungkaw tam tak saving a neihtir bakah in leh lo din kawngah nasa takin hma a sawntir bawk ang.
ii) Hnathawh tur nei lo tan hna engemawzat a siam dawn a – labour, driver, operator etc atan mizo engemawzatin hna an hmuh phah ang, hei hian family income a tihpun phah bawk ang.
iii) Company hnuaiah mizo ten contract / sub contract thawh tur an hmuh phah bawk ang.
iv) CSR Fund atangin a ram mite tana thil tha tih nan Company in 2% a pe anga, chu chu mipui vantlang tan chhenfakawm tak tur a ni.
v) 4 Lane kawng hian Zoram mipuite hun leh sum nasa takin min save sak dawn bawk.
vi) Bungraw phurh man nasa takin a tlawm phah anga, mirethei ten man tlawm zawkin bungrua an lei theih phah bawk ang.
vii) Sumdawngte tan bungraw phurh luh a awlsam phah ang.
viii) Zin veivak te tan hun rei lo te chhungin an thlen theih phah ang.
ix) Driver te tan a hahdam phah bawk ang.
x) Kawngpui chep vanga Traffic Jam a reh phah ang. Hei hian kalkawnga rei tak tak motor tâng a pumpelhtir dawn a ni.
xi) Lirthei chhuk leh chho tan a hranga tlanna tur a awm tawh dawn vangin hmazawnga insut /accident kan pumpelh phah bawk ang.
xii) Bungraw rawn lut atangin GST nasa takin a pun phah anga, lirthei atanga chhiah lo lut pawh a pun phah bawk ang.
4 Lane kawng kan tangkaipuina tur lam kan sawi rualin, hmasawnna hnathawh a nih dawnin engemaw chuan a tawrh ve a ngai tih erawh kan hriat tel a tha. He kawngpui laih tur hian kan ram leilung awmdan hmelhmang pawh a sawi danglam ngeiin a rinawm, 4 Lane alignment chhunga thing leh mau engemawzat pawh a chhe tel ngei ngei dawn a ni. Kawng hi boruakah a kal ngawt thei si lova, a kalna tur lei an laih a ngai miau bawk si a, tihchhiat amual mual chu a nei lo thei dawn lo a ni. Kan ram rohlu thing leh mau te hi ui viau mah ila a tihngaihna a awm lo. Kan CM zahawmtak Pu Lalduhoma’n Press Conference a neih tuma a sawi pakhat dik ka tih em em chu, “Kan ram hmasawn tir kan duh chuan a man kan pek ve a ngai a ni” a tih hi a ni. Engemaw channa/hlohna awm miah lovin hmasawnna hna a thawh theih ngawt lohva, a ram mite pawh hian chu chu kan inhuam ve a ngai. A tak takah chuan heng thing leh mau a tihchhiat turte hi kum hnih khat hnuah chuan ngai a rawn awh ve leh mai dawn a, a tihchhiat tur lam ringawt engto lo hian a malsawmna rawn thlen tur zawk lam hi rilruah dah lian thei ila a duhawm hle. Tuna 4-Lane kawng kal tur sawiseltute ngei pawh hi nakinah chuan a lawm tur leh a malsawmna dawng nasa hlei hlei tur an la ni lovang tih a sawi theih loh. Kan ram hi ei leh bar leh thil dangah kan intodelh si lova, state pawn atanga kan mamawh chawkluhna kawngpui tal hi kan neih that a ngai a ni.
Engtikah nge 4 Lane hi an laih tan dawn? : Harsatna hrang hrang avanga 4 Lane kawng hna tan thei lova hun rei tak a awm mek laiin tunhnaiah Sawrkar pawhin theihtawp chhuahin a chinfel dan tur kawng a dap a. Tunah hian Forest Dept chuan High Court-in RRF a thiahna kha pawmin,(4-Lane kalna tur – Roadside Reserved Forest a nih vanga User Agency te Forest Clearance dil tir an tumna kha ti danglamin) Supreme Court thutlukna – Godavarman Case a Recorded Forest a nihna ang zawkin Forest Clearance hi dil tir turin hma a la mek a. Hemi chungchang hi Mizoram Sawrkar aiawhin Forest Dept chuan ziakin Ministry of Road Transport & Highway-ah a thlen tawh bawk. He thil hi MoRT&H pawhin lo pawm tawhin NHIDCL te a tul anga hma lo la nghal turin a hriattir zui a ni. NHIDCL lam pawhin bawhzui nghalin FC dilna tura thil pawimawh leh hemiin a ken tel CA/NPV (ramngaw siam lehna tura pawisa pek tur) ngai zat te an chhut fel mek niin hriat a ni. NHIDCL hotute chuan he thil hi June thla chhunga an tihfel hman ngei an rin thu an sawi bawk. Hetih lai hian User Agency ten Forest Clearance an dil dawn takah chuan Mizoram Sawrkar pawhin Ramngaw siam lehna tur hmun – CA Land an pek ngei a ngai a, chumi CA Land tur chu tunah hian Revenue Dept pawhin an zawng mek a ni awm e. CA Land hi Forest Clearance an dilna turah upload tel ngei ngei a ngaih vangin Revenue Dept pawh hian a rang thei ang bera an pek vat a ngai a ni. Engpawhnise, Project hi a hun takah tan thei lo mah se, tun dinhmunah hna thawk tan thei tura thil a fel chho dawn nia a lan vang hian a lawmawm hle a. Harsatna hrang hrang vanga 4 Lane kawng Zoramin kan chhawr vat thei lo tur erawh a vanduaithlak takzet a ni.