Thawhtanni zan Olympic Stadium-ah Barcelona chuan Real Sociedad lakah 1-0 hnehna an chang a, La Liga table-ah pahnihna an luah chho.
Barca goal hmasa zawk hi chawlhlawk hma minute nga chauh awm tawha rawlthar kum 16 leka upa Lamine Yamal-a tihluh niin, second half hun pekbelh minute thumna a kal mek laiin Raphinha chuan mualneitu team goal hnihna hi penalty atangin a chhuihlut ve leh.
Spain tan pawha vawiruk khel tling tawh Yamal hian Ilkay Gundogan ball chhawpsak hmangin Alex Remiro ven goal-ah cool takin a thun a; hun tawp dawna Brazil winger Raphinha penalty pet chawitu kha Alvaro Odriozola niin, injury time-ah a handball a, chiang zawkin Catalan team an chak phah ta a ni.
Leeds winger hlui Raphinha hian goal dang thun belhna hun tha hmu bawk mah se hlawhtling zo loin goal ban a fuh a, chu mi perlet chu Gundogan tan hun remchang ni mah se ani pawh hian a ti goal zo bik lo.
Sociedad goalkeeper Remiro chuan pui takin Raphinha goal tur a siamsak bawk.
Mikhual team lamin tan atanga minute ngana lekah hmahruai theihna hun tha bawhpelhin, Sheraldo Becker chuan chep tak kar atanga goal zawngin goal kham chungah a chhuihliam hlauh a ni.
Xavi Hernandez-a team hian pahnihna luah chhoin, khelh thum la awmah point 14-in champion thar Real Madrid an pha lo a, point khatin an lehpelh tak Girona lakah an sang thung.
Karliamta Zirtawpni khan Deportivo Alaves khelmuala 2-2 draw hlawhchhuakin Girona chuan point hnih an hloh then a; nizan result tarlan hman loh La Liga inkhel pakhatah Girona vek hian Villarreal mikhualin, Real Madrid khelmualah Deportivo Alaves an lut a, Osasuna leh Mallorca an insu ve bawk.
Hnehna nen table-a pahnihna luah chho Barca
Get real time updates directly on you device, subscribe now.
Next Post