Hnehna nena season bul tan Liverpool

Karliamta Zirtawpni zan khan English Premier League season thar bul tannaah champion lai Liverpool chuan hun tawp dawna goal hnih khungin Bournemouth erlet lakah 4-2 hnehna nen title humhim tuma an hna hmasaber an hlenchhuak.
He inkhelah hian kumin July thla maia car accident-a boral ta an player Diogo J ota leh a unaupa Andre Silva-te pualin Liverpool chuan hun an hmang a; inkhel tan dawnah Portuguese unau sunna’n ngawi rengin minute khat an ding a; inkhel tan hnu minute 20-naah match kal lai tihtawp lailawk niin, fans lamin Jota leh a nau pual hian thawm nasa tak an chhuah leh bawk.
Minute 20-a he hun an hman chhan hi Diogo Jota Liverpool number 20 jersey a nih vang a ni.
Anfield inkhelah hian second half-a goal hnih khungtu Bournemouth mihang player Antoine Semenyo chuan inkhel entu mipui lam atangin a vun rawng avanga thliarhranna leh hmusit diriamna a tawng tih sawiin, referee Anthony Taylor chuan game kal tluang lai a tihtawp phah hial a; a hnuah he thil kaihhnawihah hian mi pakhat man a ni.
Liverpool head coach Arne Slot chuan kumin nipui insuan hun chhunga a player lei thar pali ngawt chu bultantu zingah a telh a; chu’ng zinga pakhat, Eintracht Frankfurt atanga pound maktaduai 70 zeta an sengluh forward Hugo Ekitike chuan chawlhlawk hma minute riat la awmah mikhual tlarhnung khawng char bur sutlangin Reds goal hmahruai a khung a; hei bak hi first half-ah goal dang a luhbelh lo.
Second half tir lam minute 49-ah Ekitike siamsak atangin Cody Gakpo chuan mualneitu team goal hnihna tawh ve lehin, Liverpool kh anuamsa taka chak tura beisei an ni hman a, mahse, Bournemouth beiletin second half laihawlah an siphurh an rawn sut ta mai a!
First half-a auhnawmnah hlawh Bournemouth Ghana international Antoine Semenyo chuan nungchang ropui tak a nei tih lantirin minute 64-ah mikhual siphurh pakhat zawk a sut then a; hun tawp hma minute 14 la awmah 2-2 a nihna goal Semenyo bawk hian a tilut zui leh.
Cherries hian Anfield-ah champion lai inhnehtawkpui chungin point khat an hlawhchhuak mai dawn emaw tih hnu minute 88-ah Federico Chiesa chuan Liverpool tana a Premier League goal hmasaber thunin mualneitu team hmahruaina a rawn kalpui leh a; hun pekbelh minute lina a kal mek laiin Mohamed Salah chuan The Kop hmuh lai ngeiin chiang zawka home team chakna goal a khung ve leh.
Slot chuan kumin nipui laia a player man to ber Frenchman Ekitike tana Premier League bultanna hmasaber a chhawpchhuah ruakin mithar dang pathum – Jeremie Frimpong, a club hlui ep zawnga lut Milos Kerkez leh Florian Wirtz-te an ni.