Home minister-in 3rd IR tlawh

Home minister-in 3rd IR tlawh
Lawngtlai district Thingkaha 3rd Indian Reserve (Mizo) Battalion headquarters chu Nilaini khan Home minister Lalchamliana chuan tlawhin, an hmunhma a fan bakah battalion hotute nen an inkawm.
Home minister chuan 3rd IR chu police battalion tha tak tia hriat thin an nih thu sawiin, Assam-a an awm lai pawha an thiltha tih leh hnathawh hmanga police leh Mizote tihmingthatu an nih avangin a chhuang hle tih a sawi. Tunah Mizoramah lo letin, Thingkah hmunah Battalion headquarters tha tak an luah thei chu a lawmpui thu sawiin, an battalion hmingthatna chu chhawmnung zel turin a chah. Tun sawrkarah uniform, silai leh an mamawh hrang hrang chungchangah police te a tha thei ang bera thuam tura hma an lak thu sawiin, a hlawhtlinna hmuh theiha a awm chu lawmawm a tih thu a sawi.
3rd IR Bn hi 2008 May 12-a din a ni a, 2010 January 28 atanga 2023 March 28 thleng Assam-ah an awm. Assam-a an awm lai hian duty tha taka an hlenchhuah thin bakah an thawhna hmuna mi harsate tan cheng vaibelchhe 1.70 chuang hu tanpuina an pe chhuak a ni. Thingkaha Battalion Hqrs hmun hi kumin April 12 atang khan luah tanin, Lawngtlai leh Siaha district hi an mawhphurhna huamchin (area of responsibility) atana ruat a ni a. Battalion Hqrs bakah Lawngtlai district-ah post 5 leh Siaha district-a post 3-ah an insem darh a ni.