Nasa lehzualin kuhva check dawn

Nasa lehzualin kuhva check dawn
Dan loa ramdang atanga Mizoram kaltlanga kuhva tawlhte chu nasa lehzuala check turin state sawrkarin hma a lak mek niin minister Robert Romawia Royte chuan a sawi.
Ningani khan Sports & Youth Services minister Robert Romawia hian Chuhvel khuaah volleyball court leh Sihthiang khuaa Sports Centre a hawng a. Chuhvelin international standard volleyball court an nei thei ta chu lawmawm a tih thu a sawi a. Chuhvel khaw zauhna hmuna electric current la lut lo chu a ranglama ngaihtuahpui an nih tur thu sawiin, volleyball court awmna approach road pawh siam a nih theihna’n hma lakpui a tum tih a sawi.
Kuhva hralhna chungchanga harsatna awm thin chu pawi a tih thu sawiin, dan loa Myanmar atanga kuhva lo lut chu nasa lehzuala check turin sawrkarin hma a la mek tih a sawi.
Sihthiangah hian Sports Centre thar lawmna ruai MPF phalna thlapa theh theih a ni chu lawmawm a tih thu minister hian a sawi bawk.
Chuhvela volleyball court hi kum 2020- 2021 Pradhan Mantri Jan Vikas Kaaryakram (PMJVK) Scheme atanga siam niin, cheng nuai 31.20 hman theihna tura pawmpui a ni a. A siamna atana zaa 90, nuai 28.08 hi sawrkar laipui tum niin, zaa 10 – nuai 3.12 hi state sawrkar tum a ni. Volleyball court hian gallery, fencing leh light system a kengtel a ni.
Sihthianga Sports Centre sakna atan hian 2020- 2021 PMJVK Scheme atangin nuai 102.59 hman phalna hmuh a ni a. Project cost atanga 90% – nuai 92.33 hi central tum niin 10% – nuai 10.26 hi state sawrkar tum a ni. Basketball leh futsal khelh theihna court, RCC flooring-a siam a ni a. Fibre glass basketball board leh ring bakah futsal goal post leh net dah a ni. Pavilion bakah dressing room pahnih dah a ni a. Zan lama inkhelh theihna turin light system dah a ni. Volleyball court leh Sports Centre hi M/s Junior Consultancy Services-in a sak ve ve a ni.