Home Minister-in din tum lo?

Inthlanpui lo awm turah home minister
Lalchamliana’n din a tum lo nia sawi a ni a, thu chiang erawh hriat a har.
Candidate tur thlangtu MNF nomination committee-ah Lalchamliana hian thangthar ken a tum thu a thlen a, ziaka thlen chu a ni lo. |awngkain a thlen a, a lamhnai thenkhat bulah pawh din a tum loh thu hi a sawi tawh tih thu dawn a ni.
Thu dawn danin, Lalchamliana hian nomination committee hnenah hian candidate atan thlang lo mah se a pawm tur thu, thangthar a ken theih tur thu a sawi a ni.
A bial Hrangturzo MNF lam erawhin an bialtu MLA a ding tawh dawn lo em ni tih thu-ah thuchiang an la hre lo nia hriat a ni a, MNF atanga an bial viltu an nei rih lo. Ngaihven nghal chu an awm a, mahse an bialtu ding lai a ding dawn lo tih a chian si loh avangin langchangin an che thei lo nia hriat a ni.
Nomination committee hi vawi li an thu tawh a, an thutkhawm hnuhnun ber chu June ni 19 kha niin, Hachhek biala ding tur tih loh candidate tur hi tihfel an la nei lo.
MLA 28 an nei mek a, MLA ni laite hi ding leh tura ngaih vek an nih rualin ding lo thei dinhmuna ding pawh an awm tih thu dawn a ni. Nomination committee hi an la thleng thui lo a, buai theihna tur khawp an la thleng lo tih thu dawn a ni bawk.
MNF bial ni lai, MNF tana bial awl ni tur chiang saa ngaih chu Chalfilh bial a ni a, a bialtu, assembly speaker hi MNF ticket chang lo tura ngaih a ni. Chalfilh bial hi mahni tum tuma tum an awm mek nia hriat a ni.