Home minister-in ramri tlawhkual ILP pe fimkhur turin duty-te chah

Home minister-in ramri tlawhkual
ILP pe fimkhur turin duty-te chah
Home Home minister K Sapdanga chuan Inrinni khan Kolasib district leh Assam Hailakandi district inrina hmun, Bairabi leh Vairengte lam a tlawh kual a, ramria police duty-te dinhmun a en bakah an hmunhma fangin, khawtlang hruaitute a kawm bawk.
Bairabi khawtlang hruaitute, sawrkar official-te leh tlawmngai pawl hruaitute nen an inkawmnaah Home minister chuan, kumin September 13-a Mizorama rel kawng thar hawn tura ruahman chu hmasawnna ropui tak a nih rualin, hei hian state dang atangin mikhual tam zawk rawn luhna kalkawng a hawng zau sauh dawn a, chumi piahlamah a let zawnga ruihhlo lo luhna kawng pakhat a ni thei, tiin, dan hnuaiah Mizorama rawn lutte felfai taka chhinchhiaha an rawn luh theihnan ILP pek kawngah fimkhur zawka hma lak a tul tih a sawi a. Heng thil hi sawrkarin a hmuna chengte nen sawiho tha a tih avanga kal a ni tih a sawi.
Bairabi khawtlang hruaitute chuan Bairabi ILP check gate-a hman mek hi Covid len laia screening point-a hman thin a ni a, temporary ILP check gate-atan hman chhunzawm a ni a. ILP check gate hi sawrkar hnuaia dan anga changtlung zawka din a nih thuai theihnan hma lak tha an tih thu an sawi. ILP check gate hela Tlawng dung atanga Mizoram rawn lut thin an awm tih pawh sawiin, Tlawng dunga ILP check gate awm a tul tih an sawi a ni. Bairabi leh a chhehvela hnamdangin awmhmun rawn khuar thinte dap chhuah kawngah sawrkarin chak takin hma la se an duh tih an lo thlen bawk.
Heng bakah hian state dang atanga dan loa lo lutte leh dan phal loh bungrua lo lut chak zawka dapchhuah leh ven dan sawiho a ni.
Home secretary Vanlalmawia chuan Mizorama rel lo lut tura avanga sawrkar inbuatsaihna a sawi a. Rel station 5 zinga 4 chu Kolasib district ami a ni, tiin, Railway Police din chungchanga sawrkar ruahmanna, ILP counter kalpui a pawimawh dan leh ruahmanna, hemi chungchanga inhrilhhriat zau dan tur ruahmanna siam a nih thu a sawi.
Home minister hian Bairabi atangin Phaisen leh Vairengte panin ramri dinhmun a enfiah zui a. Kolasib district-a ILP check gate awmte a tlawh zui a. Vairengte khawtlang hruaitute nen an inkawmnaah Assam sawrkarin an state-a dan loa an awm Bangladeshmi an hnawhchhuah tirh atangin mipuia puangzar loin state sawrkar chuan ramria duty-te a thuamtha ve sauh tih a sawi a.
Hlawhtling tak tak tur chuan khawtlang nen tanrual a ngai tih a sawi.