Hong Kong-in a nihna hloh nasa zual zel

Hong Kong-ah fiamthu thar lar zet a awm a: tualchhung mite chuan an khawpui chuan global capital ‘darling’ nihna a hloh tawh an tia. Fiamthu dangah chuan UNESCO world heritage site thar ber an ti bawk.
Security law khauh tak Article 23 tih chu Hong Kong ah hman a ni ta a, chei vang hian hlauhthawnna nasa tak a awm.
Thuneitute chuan Hong Kong himna leh ngelnghehna tur a ni an tih laiin sawiseltute chuan lungawilote chu closed-door trial hmangin dam chhung Hong Kong pawna tantir theihna a ken tel avangin leh hote te pawh ram leh hnam phatsanna tia lakluh vek theih a nih avangin Hong Kong tawpna tur an ti ve thung.
Beijing chuan Hong Kong a thununna a tinghet tial tial a, US-China inkar a chhe mek zel bawk a, chungte chuan foreign investor te Hong Kong atangin a hnawt kiang zel tiin real estate surveyor Chan chuan a sawi.
“Tun hma chuan Hong Kong chu China nena danglam tak a nih avangin investor ten investment an ti nasa a, tunah chuan a ni tawh lo” tiin a sawi.

Article 23 leh a hnu lam
National security tih leh ‘foreign forces’ te hlauhawmna tih leh Beijing inpolicy a kalpui te chuan Hong Kong a foreign capital leh sumdawnna hrang hrangteah hlauhthawnna nasa tak a siam a ni.
“Tun hnai kum hnih chhungin sumdawnna a tlahniam em em a, eng mah sumdawnna liantham a inremna siam a awm lo” tiin Tsem Chinese state-owned bank a thawk chuan a sawi a. An company chuan nikum June thla khan an staff 10% an ban a, kar kalta khan 5% an ban belh leh a ti bawk a. “Staff ten ban an nih hun tur an nghak tawp ang a ni” tiin a sawi bawk.
Article 23-in sumdawnna a nghawng dan tur chiah hriatfiah theih a la ni lo chungin a huamchhung a zau em em a, bawhchhiat a nihin a hremna a nat em em bawk si avangin nghawng a nei na viau dawn a ni tiin Johannes Hack, president of German Chamber of Commerce chuan a sawi.
Hong Kong thuneitute thung chuan Article 23 chuan khawpui chu nglenghet atangin hnianghnarah a siam dawn an ti thung a, normal businesses te a khawih dawn lo an ti thung a. Ram dang te pawhin security law an nei ve vek chunga Hong Kong bik khalh fal chu a dik lo an ti bawk.
Hong Kong Article 23 hi China-in kum 2020 a national security legislation a siam tihzauhna a ni a. Hong Kong General Chamber of Commerce chuan tualchhung leh foreign businesses leh professional te tan him zawka siamna tur a ti a.
Hong Kong economy chu kum 2019 a pro-democracy protest Beijing in crackdown a kalpui hnu atangin a tlahniam char char a. Commercial leh retail space rental te a ruak nasa a, office building leh dawr te pawh a ruak nasa hle bawk. Khualzin an tlem tial tial a, nikuma Hong Kong-in khualzin a neih te kha pre-pandemic figure nena khaikhinin 60% chauh a ni.
Hong Kong crown jewel tia sawi Hang Seng index pawh kum 2019 atangin 40% in a tlahniam tawh a. January thla khan India chuan khumin stock market lian ber palina nihna a chhuhsak bawk. Finance lamah Hong Kong chu Singapore-in a khum mai dawna ngaih a ni bawk a. Global banks te chuan Hong Kong leh China a an hnathawkte an titlem zel bawk a, chu chuan investor confidence a tihniam nasa a ni.
Sumdawng lian ten khawpui an chhuahsan nasa hle tawh a, Morgan Stanley Asia head hlui phei chuan newspaper column a ziahah “Hong Kong is over” a ti hial a. Veteran investor Lam Yat-ming chuan economic magazine a article a ziahah investors te chuan Hong Kong stock an rauhsan a ngai a ti hial.
“Hong Kong kan ngaihdan a danglam ta” tiin Hack chuan sawi bawkin, “Hong Kong chu mainland China lakah chuan la danglam tak a ni chungin security thlurbing na chuan mipui rilru a khawih danglam nasa tawh” tiin a sawi bawk.

One country, two systems
British colony hlui hi kum 1997 a China hnena hlanlet a nih pawh khan ‘one country, two systems’ principle a enkawl a ni a. Beijing chuan Hong