Hospital hmasawnna

India rama sorkar damdawi in tha bik thlan zingah District Hospital pahnih – Siaha District Hospital leh Lawngtlai District Hospital an tel a. Hei bakah hian East Lungdar PHC leh Phuaibuang PHC te pawh Primary Health Centre tha thlanchhuah zingah an tel bawk a. He mi hma pawh hian National Quality Assurance Standards (NQAS) tehkhawng hmanga damdawi in leh PHC tha thlan chhuah zingah Mizoram atangin an lo lang nual tawh bawk.
A bikin Siaha leh Lawngtlai distict hospital te hmasawn dan hi a ropuiin a fakawm hle. Kum 8 vel kaltaah khan Mizoram chu Infant Mortality Rate (nau piang kum khat tlin hmaa thi) ah kan sang hle a, Mizoram IMR chu 32 a ni. District hrang hrang zinga sang ber pahnih pawh Lawngtlai (29) leh Siaha (28) te hi an ni. Mizoram health department-in hma an han la tak tak a, kum rei lote chhungin IMR hniam chak ber nihna a hauh leh ta a, tun dinhmunah hian Mizoram IMR chu 3 chauh a lo ni ta; Nagaland nen kan inang. India ram IMR chu 26 a ni mek bawk.
Tichuan, Siaha District Hospital hian India rama nau neihna hmun tha bik leh inzaina hmun tha bik tehna LaQshya certificate an hmu tel a, LaQshya bikah hian Platinum Certificate an dawng pha bawk. Hemi bakah hian naupang damlo enkawlna hmun tha bik tehna, MusQan-ah an tling bawk a ni. Lawngtlai District Hospital pawh hian LaQshya certificate an hmu tel bawk.
Tun kum 10 kal ta chhung hian Mizorama damlo enkawlna hospital leh centre hrang hrangte hian hmasawnna chak tak an nei a tih theih awm e. Damlo enkawlna hi, infrastructure lamah a ni emaw, hmanrua lamah a ni emaw, fai leh thianghlimna lamah a ni emaw, hma kan sawn chak hle a, a lawmawm rual rualin, damlohna lam hi a pung ve zel emaw tihtur a ni thung. Hei hi a bulpui ber chu lifestyle uluk tawk loh vang leh dam chhunga thil pawimawh ber taksa hriselna enkawl kawnga kan la hniam em vang hi a nih a rinawm a. Mahni taksa enkawl kawnga awareness inpek tam leh hi kan mission pakhat atana kan hman a pawimawh dawn hle a ni.