Ningani zan khan Spanish Super Cup semi-final match hnuhnung zawk khelh niin, sithum faia RCD Mallorca sawptu Spanish champion Real Madrid chuan Nilaini zana sihnih faia Athletic Bilbao hneha final lut hmasa Barcelona an hmachhawn dawn a, Super Cup Clasico hi naktuk, Pathianni zana khelh tur a ni.
Jeddah, Saudi Arabia-a King Abdullah Sports City stadium-ah first half chhungin goal a lut lo a; second half tir lam minute 63-ah England midfielder Jude Bellingham chuan Bernabeu club hmahruaina goal khungin, Real tana a game khelh hnuhnung vawikuaa a goal sarih tihluhna a ni a, season kal laia a goal kaw thunna a ni nghal bawk.
He goal khat hi final luhna’n an duhtawk thei mai dawna a lan hnu hun pekbelh minute hnihna a kal mek laiin nikum Copa del Rey finalists Mallorca defender Martin Valjent chuan ‘own goal’ hmangin Real hmahruaina a belhchhah a; hun pekbelh minute ngana a zawh hmain Brazilian Rodrygo chuan Lucas Vazquez siamsak atangin chiang zawka Spanish giants chakna goal a thun zui leh ta a ni.
Real Madrid hian record ding lai nihrualpui tumin final an khel dawn a, Clasico-ah hian an chak chuan Spanish Super Cup title tum 14 la tling thei Catalan team record an tluk chiah dawn a ni.
Nilaini semi-final hmasa zawkah Barcelona chuan Gavi leh Lamine Yamal-te goal khat ve ve tihluh hmangin Athletic Bilbao lakah 2-0 hnehna an chang a, title 14 an kawl tawh belhchhah tumin khelmual an lut dawn a, vawi 13 champion ve tawh Real-in Barca record tluk an tum thung ang.
Barcelona leh Real Madrid hi Spanish Super Cup final match hnuhnung pahnihah pawh khan an intum ve ve tawh a, kumin hi a zawna Cup final vawithum an khelhna tur ve ve niin, nikum khan 4-1 tehrengin Carlo Ancelotti team an chak a, kum 2023 final-ah Barca an dingchang zawk ve thung.
Spanish Super Cup hi kum 2020 atang khan team paliin an khel a, chu’ng club palite chu LaLiga leh Copa del Rey lama winners leh runners-up ve ve te an ni.
Spanish Super Cup final: Real vs Barca
Get real time updates directly on you device, subscribe now.
Prev Post