Hospital thli (Bio-medical-waste)

Nimin khan Aizawl East – II bialtu MLA chuan a bial thenkhat a fannaah Dawrpui West Welfare Committee-te nen Civil Hospital Aizawl thli vanga harsatna thlenna hmun an tlawh a. Civil Hospital thli hi kawngpuiah luang thlain hei hi veng mipuiten an ngaimawh a. He harsatna hi sutkian a nih theih nan health department te nen tanghovin, SASCI project atanga hmalak a tum thu bialtu MLA hian a sawi a.
A tir atanga hospital hmun tura duanah hospital sak a ni chungin, khuareiah chuan hospital thli balin khawtlang harsatna a thlen leh mai thin a. A tir atanga hospital atana duanlawk pawh ni lo, chenna in pangngai kara ding building ruak luaha hospital din ta nawk nawk hi Aizawl khawpuiah hian a awm ta nual mai a. Hospital atana duanlawk pawh ni se, vantlang chenna hmun (residential area) atana hmun ruata hospital din hi a rem teh teuh lo a, hospital chhehvela chengte tana a thatlohna leh harsatna a thlen theih dan chu thuhran ni se, damlo enkawl mekte tan pawh a thatlohna tam tak a awm thei bawk. Hei hi chu a la tih nawk nawk theih a, mahse hospital thli bal chi hrang hrang sawngbawl leh thehthang kawngah hian, mipui harsatna thlen satliah ni lo, natna hri tha lo tak tak inkaidarh theihna ‘chance’ a sang em em bawk a ni.
Aizawl hi khawpui thang lai a nih angin mihring kan pung chak a, a tir atanga Planned City ni lo ta chu, thil engkim mai hi phuahchawp taka kalpui a ni deuh vek mai a, engmah hi a fel thlip thlep thei tawh lo.
Hetih lai hian, kan mamawh em em hospital-te hian tun ai hian hospital bawlhhlawh (bio-medical waste) sawngbawl leh thehthang kawngah, dan awmsa zawm tha turin inbuatsaih hram hram se, thuneitute lam pawhin damdawi in bawlhhlawh thehthang dan hi uluk takin enzuiin mipui tana him lo thei tur leh harsatna siam thei tur laka fihlim theih nan thahnemngai takin vil zui thin se. Hospital kan mamawh kan tih lai hian, a lehlamah hospital hi mihring harsatna thlen thei zawnga a awm leh hlauh si chuan awmzia a awm dawn lo a ni.
Engkim mai khawpui chhunga dah vek kan tum hi a fuh lo tih chu kan traffic tawt dan hian a lantir chiang hle a, hmasawnna ruhrel lian hi daifem lama kan dah thiam a pawimawh ta hle a ni.