FIFA Global Citizen Education Board-ah Shakira leh The Weeknd an tel

FIFA Global Citizen Education Board-ah Shakira leh The Weeknd an tel
FIFA Global Citizen Education Fund’s Advisory Board a tel te hi an hraw hlawm hreih hrawih khao mai a, niminpiah khan he board-ah hian Shakira leh The Weeknd te an tel thu an puang a, board member dang zingah Ivanka Trump, Hugh Jackman, Gianni Infantino, Hugh Evans leh Serena Williams te pawh an tel a, anni bakah hian entertainment, sports leh sumdawnna lama mi hlawhtling leh huhang nei lian tak tak te pawh an tel a, khawvel hmun hrang hrangah sum leh pai lama harsatna nei te pawhin awlsam leh zangkhai zawka lehkha an zir theih nan 2026 FIFA World Cup tan hma ngeiin dollar maktaduai 100 tal tuak ngah hman an tum dawn a ni.
Global Citizen hian ram hrang hrang 200 chuangah naupang 1,00,000 tal tan kawng hawn theih dan an zawng hmasa dawn a, puihna dawng hmasa turte hi 2026 kum bul lamah an puang ang. Global Citizen atanga puihna mamawh te tan globalcitizen.org/education-fund-apply ah ngaihven theih a ni.
Chairty pawl, Global Citizen hian kawng hrang hrangah hma an la zau khawp mai a, khawvel sik leh sa danglam chak lutuk avanga harsatna te, retheihna umbo tumna kawngah, khawvela intluktlanna tha zawk a awm theih nana hmalakna kawng te campaign, conference leh awareness te neiin hma an la zau hle a ni. Tuna an hmalakna lian tak pakhat chu Global Citizen Festival: Amazonia niin, Brazil-ah neih a ni dawn a, hetah hioan Amazon ramngaw humhalh a nih theih nan dollar tluklehdingawn tuak ngah an tum mek bawk a ni.