House-ah Ethanol chungchang…

Assembly Session kal mekah nimin khan zawhna leh chhanna hunah Serchhip bialtu MLA Lalduhoma chuan Commerce and Industries Department changtu minister R. Lalthangliana chhan atan Ethanol chungchang a zawt a, mahse minister hian engmah hmalakna a awm loh thuin a chhang a.

-- Advertisement --

Zawhna zawttu zawhnate hi — (a) Mizoram Sorkar hian Numaligarh Refinery nen Ethanol siam tura indawrna a nei em? (b) Eng chen nge kalpui a nih tawh? (c) Agreement siam a nih tawh chuan a copy min pe thei em? (d) Kan ram economy tan eng ang takin nge tangkaina a neih ang? tih a ni.

Zawhna zawttu hian Mizoramah Ethanol siamchhuah chungchanga hmalakna kal mek a awm nia hriain zawhna a zawt a ni a, a zawha te ber Commerce & Industries department hi chuan Ethanol chungchangah hmalakna an lo nei si lo va, session thlirtu mipui tan a hrilhhaithlak hle a ni.

Nimin Session zawhna leh chhanna hun kha member thite sunna hunin a lak hek tam deuh avangin zawhna pahnih chauh lak hman a ni a; zawhna pahnihna phei kha chu Speaker-in ama sawi dan takah, mit siai deuh chunga a lak luih hram a ni a, zawh belhna hun a awm zui theih tak loh avangin Ethanol chungchanga Mizorama hmalakna a awm leh awm loh mipuiin an hre thei ta rih lo a ni.

Kan hriat angin tun kar Thawhtanni khan PM Modi chuan Ethanol 20 per cent nena pawlh petrol (E20 blended petrol) chu State 11-a petrol pump-a pek chhuah tan turin a hawng a. India hian kum 2030-ah chuan E20 hi ram puma hman theih turin target a siam a, chutih laiin tuna hmalakna kal chak dan enin 2025-ah target hi thlen hman beisei a ni.

India rama ethanol siamchhuahna hnar ber chu sugarcane a ni a. He hmalakna hian sugarcane chingtute tan sum lakluhna tha tak a siam mek a. Ethanol avang hian India chuan petrol chawkluhna kawnga foreign exchange-a sum chhuak tur cheng vaibelchhe 53,894 a hum theih phah tawh a, Carbon-dioxide emissions 318 lakh tonnes-in a hniam phah bawk.

Zawhna neituin kan ram economy tan eng ang takin nge tangkaina a neih ang, tia a zawhna hian ngaihtuahzui a phu hle a. Ethanol siamchhuahna atan hian kan state-in a ngah em em mau te pawh a hman theih a. Tuna India rama ethanol siam chhuahna raw material zinga a pui ber berte hi Mizorama tharchhuah tam theih sugarcane leh Vaimim te an ni a; Oil Palm buaipui aia hautak lo zawk, awlsam tea mi tinin bul an tan ve theih mai a ni a; kuthnathawktute tana eizawnna tling siam theihna tur thil niin a lang.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More