House-ah thudik chauh sawi tawh turin ZPM MLA chah

Assembly Session-a thudik lo sawi vanga ZPM MLA Pu Lalduhoma’n ngaihdam a dil a ngai chu zahthlak an tih thu leh House-ah thudik chauh sawi tawh turin an duh tih MNF chuan an sawi.
MNF Gen. Hqrs. thuchhuak chuan, Assembly Session kal mek February 21-a imfiammi pakhat inhliam tanpuina pek chungchangah Sports minister Pu Robert Romawia Royte leh Opposition Group leader Pu Lalduhoma te thu inhmu lo leh inhnialna thu kal zelah Assembly speaker Pu Lalrinliana Sailo chuan thudik hailang a, a dik lo zawkin ngaihdam dil tura a tih angin, February 22 khan thudik hailan a ni ta a, Pu Lalduhoma chuan a dik lo zawk a ni tih pawmin House-ah ngaihdam a dil tih sawiin, Mizoram rorelna in sang berah thudik lo a sawi ngei tih hailan a ni chu zahthlak a tih thu leh thudik hailan a ni erawh lawmawm a tih thu a sawi.
Tun Session-ah Sports department hmalaknaa Pu Lalduhoma’n thudik lo a sawi zingah, PMJVK Scheme-ah Sports department-in guidelines kalha sum hmu teuh teuh anga a sawi laiin, thudik chu, PMJVK guideline ang thlapin Mizoram sports leh thalaite tan fund pek a ni tih a sawi a. UD&PA sum pawtpenga sports atana hmang anga House-a a sawi pawh thudik lo a ni, tiin, UD&PA-in urban infrastructure a siam zingah sports infrastructure a siam zawk a ni tih mipuiin hria se MNF chuan a duh hle tih a sawi bawk.
‘Hetianga thudik lo, lang chhuak leh mai turah pawh thih ngam lupua Pu Lalduhoma a tang ngam khan a zia dik tak a pholang chiangah kan ngai a. Thudik ziktluak lo leh belhchian dawl lo, tunhma atanga a chin than, thudik hrula dawt a sawi tam thin zia leh a inzir peihloh zia a tilang chiang hleah kan ngai,’ a ti.
Infiamna lama tuimite politics hmanruaa hmang a, hamthatna um vanga thudik lo ngialngan hman tangkai tum chu a ram hmangaih lo zia hle tih MNF hian sawiin, ‘Lal chak lutuk avanga khua hmu lo ZPM hian thudik lo sawi bansan turin kan chah a ni,’ a ti.
Assembly House zahawmna humhim tura speaker Pu Lalrinliana Sailo hmalakna leh, huaisen taka Assembly House-ah Sports minister Pu Robert Romawia Royte in thudik a tan ngam chu a chhuang takzet tih MNF hian sawiin, House leader, chief minister Pu Zoramthanga, minister-te leh ruling MLA-te House-a an chet dan chu puitlin thlak a tiin a chhuang hle tih a sawi bawk.