House atangin eptu MLA-te chhuak

Kar khat an chawlh hnuah Thawh\anni khan Budget Session chhunzawm leh a ni a, hemi ni hian House a\angin eptu MLA-te an chhuak. LESDE minister Lalnghinglova Hmar putluh Mizoram Youth Commission Bill, 2025 sawihonaa house leader thil sawi danah lungawi lovin eptu MLA-te hi an chhuak a ni.
Mizoram Youth Commission enkawlna dan siamthat ngaite siamtha ni lovin sorkarin dan thar siam a tum a, hei hi an sawiho a, house leader Lalduhoma’n sorkar hmasa MNF leh Congress sorkarte chu dik lo taka dan siamah a puh a ni.
2005-ah he dan hi MNF sorkar laia siam a nih thu a sawi a, ‘He dan hi siam ila, a thawktu tur lak kawngah erawh chuan dan leh hrai behchhan engmah awm lo se,’ ti rilru chunga he dan hi siamah a puh a, ‘Sum leh pai pawh duh ang anga kan sawp kawi theih turin, audit pawh hi ti lo ang u,’ an ti niin a sawi.
He thu a sawi lai hian leader of opposition Lalchhandama Ralte a lo ding a, “He House zahawmna hi vawn hram hram tha ka ti,” tiin, “He Bill kan sawiho laia tel ve ngei a ni a, kan House leader hi. Khatiang rilru kha tuma sawi loh a ni a,” tiin 2005-a he dan an siam laiin tuna House Leader hi a tel ve tih a rawn sawi.
House leader-in a sawi chhunzawm a, 2025-ah he dan hi Congress sorkarin an siamtha (amend) tih sawiin, “… a pawi lai, a tha lo lai hi an amend duh miah lo,” a ti. “MNF thinlung tawmin, vawiin thlengin he dan tha lo hi siamthat ngaiin an hnutchhiah a ni,” a ti bawk.
Lawngtlai West Bialtu C Ngunlianchunga a rawn ding ve leh a, “Congress sorkarin a ni emaw MNF sorkar emaw, khatiang ang zawnga siam duh lo anga kan House Leader-in a sawi kha chu, House record-ah pawh a nalh lo ang a,” a ti.
Amend a pawi an ti a nih loh thu, a kim lo lai belh an pawm thu a sawi a, a thar siam inti sia dan hmasaa mi 70% lai chhawp chhuah a ni tlat si chu mak an tih thu a sawi bawk.
“Kalphung thara kal kan ni a, dan tha lo kan siamtha zel dawn,” tiin House Leader-in a chhang.
LESDE minister-in a khaikhawm a, mahse leader of opposition-in ram hruaitu hmasate diriam taka tih an nih avangin an pass pui ve thei lo tih Speaker a hrilh a, eptu pawl member-te an chhuak ta a ni.
Hetihlai hian LESDE department atanga lut tho, The Mizoram Private Placement Agencies (Regulation) Bill 2025 chu eptu member-te telpuina in Thawhtanni vek khan House-in a pass thung.
Bill puluttu LESDE minister Lalnghinglova Hmar chuan he Bill hi dan hman mek, The Mizoram Private Placement Agencies Regulations Act 2015 thlakna tura siam a ni tih a sawi a. Mizoram pawna hnathawk duhte hna zawnsaktu, private placement agency-te kaihhruaina dan a nih piahlamah awmze nei zawka kalpui a nih theihnan leh, hnathawk tura thawn chhuahte himna leh hna sang zawk an thawh theihna tur a ni tih a sawi.
Ram pawna thawk chauh niloin, Mizorama thawkte tan pawh inkaihhruaina mumal tak a awm tawh dawn tih sawiin, domestic worker-te chauh ni lo, Mizo thalai lehkhathiamten ram pawna hna an thawh theihna tura duan a ni a, he dan hnuaiah hian kum 18 chunglam bak chhawr theih an ni dawn lo tih a sawi a ni.