Household Registration Bill hman thuai beisei

Mizorama chengte fel taka chhinchhiah nan leh dan loa pemlut venna atan Household Registration Bill chu a taka hman theih tura siamthat thuai an tum tih chief minister Lalduhoma chuan a sawi.
Kum 2019-a Mizoram State Assembly-a ‘Maintenance of Household Registration Bill’ pass tawh chu India president pawmpuina a ngai a, tun thlengin pawmpui pek a la ni lo tih chief minister hian sawiin, president pawmpuina pe tur hian Bill hi a nihna anga pawm harsa tih lai an lo nei a, hnukkir a, a thar bill pass leh mai turin an rawn a. Hei hi buaithlak zawka a hriat avangin, pawmpui harsa an tih lai chu hrilh se, chumi ang chuan State Assembly-ah siamthat leh mai zawk a rawt tih sawiin, Assembly Session neih hmasak berah House-a pharh tura peih hman an inbeisei tih a sawi.
He thil hi Bangladesh atanga dan lo Mizorama lut te danna atan an duh tih a sawi a. “Mi an pem dawnin, an pem san tur atangin pem lehkha an la anga, an pemna turah an lo chhinchhiah ve leh dawn a ni,” tiin he dan hi a taka hman theih huna hman a nih dan tur chief minister hian a sawi a ni.