Hri vei hriat thar awm rih lo
India ram hmun hrang hrangah Covid-19 hri vei hriat thar an awm a, Mizoramah vanneihthlak takin hri vei an awm rih lo.
May ni 30-ah khan Mizoramah hri vei hriat thar pahnih an awm a, pakhat hi June ni 4, pakhat dang June ni 5-ah damdawi in atangin an chhuak. Hri vei hriat thar mi dang an awm rih lo.
Covid-19 vei leh vei lo endikna hi ZMC-ah a awm a, sample endik hi chu an awm deuh reng. Tun thlaah sample sample 51 endik a ni tawh a, vanneihthlak takin hri vei an la awm lo.
Integrated Disease Surveillance Programme (IDSP) hotute chuan Covid-19 hian min chen chilh tawh a, chuvangin hri vei hriat thar an awm zeuh zeuh tura ngaih a nih thu leh, hriat thar an awm a nih pawhin chi-ai tur a nih loh thu an sawi a, chutiang chu khawvel ram tin dinhmun a nih thu an sawi. Mizoramah hri vei an awm lo a nih pawhin hri lakah Mizoram a fihlim tihna a ni chuang lo thei tih an sawi bawk.
Chutih rual chuan enkawl sen loh khawp hri vei an awm ang tih a hlauhawm thu leh, chu chu khawvelin a hlauh a nih thu an sawi a, Mizoram dinhmun hi tunah rih chuan a that thu an sawi.
India ram hmun hrang hrangah tunlaiin hri vei hriat thar an awm a, hei vang hian sorkar laipuiin theihtawp a chhuah a, Mizoram dinhmun pawh an ngaichangin an vil reng a, sorkar laipui thu hi Mizoram pawhin a ngaichang reng, IDSP hotute chuan an ti.
Tun dinhmunah Mizoramah PPE a awm tha a, damdawi a awm tha a, oxygen cylinder pawh a awm tha tih an sawi a, mahse damdawi in thenkhat chu oxygen chungchangah hian en fiah ngai a awm tih an sawi.
Ministry of Health and Family Welfare chhinchhiah danin, June ni 16 zing dar 8 thleng khan India ramah kuminah covid-19 hri vei mi 7,264 an awm a, a tukah 6,836-ah a tla. Thawhlehni tuk thleng khan kuminah India ramah he hri vei hi mi 13,600 chuang an awm tawh. Kerala, Gujarat, West Bengal, Delhi, Rajasthan, Maharashtra, Karnataka, Tamil Nadu-hte a vei hi an tam a, hmarchhak lam chu him rihah ngaih a ni.
Tun hnaia Mizorama hri vei hriat tharte hri vei kha Covid-19 hri Mizorama awm sa nge a chi thar (variant thar) tih hriat a ni rih lo a, endik mek a ni tih thu dawn a ni.