By Mahmuaka Chhakchhuak
-- Advertisement --
I Pet. 1;3 thu kan chhiar chuan ‘Kan Lalpa Isua Krista Pathian leh Pa chu fakin awm rawh se. Ani chuan a khawngaihna nasa tak ang zelin, mitthi zing ata Isua Krista thawhlehna avangin beiseina nung hmu turin min hring leh a’ tih thu kan hmu a. Helai Bible changah hian Lal Isua zirtir zinga a khaipa ber mai Petera mimal nun fiah takin tihlanin a awmin amah ngeiin hetiang hian a rawn sawi ta a ni.
Petera hi Lal Isua ngeiin Sangha man tura a len deng lai a hnung zui tura a koh a ni a, Matt. 4;18,19 thu kan chhiar chuan len denga luia an awm laiin a ko a, ‘Mi zui rawh u, tichuan, mihring man tuah ka siam ang che u,’ tiin a ko a, anni pahnih; Petera leh Andria chuan an len kalsanin an zui nghal mai a ni. Chumi atang chuan Lal Isua kalna apiangah an kal ve ta zelin a rawngbawlna hmun hrang hrangah chuan rinawm takin an zui zel a, tumkhat chu Petera hian Lal Isua tehkhinthu sawi chu alo hrethiam hauh lo mai a, Lal Isua chu a zawt ta a. He tehkhin thu hi mipui hmaa sawi a niin mihring tibawlhhlawh chungchang a ni a, chu thu chu Lal Isua zirtirte ngei pawh chuan an lo hrethiam bik hauh lo ni tur a ni, Petera chuan ‘Tehkhin thu kha min hrilhfiah ta che’ tiin a zawt ta a ni. Lal Isua chuan ‘Tun thlengin nangni pawh hriatna nei loin in la awm cheu maw?’ tiin mak a tih thu a sawi hial a. Chuti chuan a tehkhin thu chu a hrilhfiah zui ta nghal bawk a.
Chutianga Lal Isua zuia rawngbawlna an han neih fe hnuah pawh chuan Zirtirte chu an la fiah zo tak tak thei chuang lo a, vawi khat kohna (Piantharna) mai chuan rei alo daih lo pawh a ni ang a, an thinlung ngaihtuahna chu ala var tak tak thei lo a ni. Matt. 19;27,28 thu kan chhiar chuan Petera bawk chuan Lal Isua hnenah ‘Ngai teh, engkim kalsanin kan zui ta chia; engnge kan hmuh ang le?’ tiin zawhna dik deuh leh tha deuh nia lang chu a han zawt leh ta phawng mai a. A dik chiah a ni, Petera hian Lal Isua a zui dawnah khan an eizawnna hmanrua ber Len kha an lendenna hmunah hnutchhiahin an zui nghal mai kha a ni a, tunah (engtia rei nge hre chiah lo mah ila) hei leh chen Lal Isua an zui tawh hnuin an lawmman tur engmah sawi rik ala awm si lo chu an mihring mihrinna thinlung chuan a tlin tawh ngang lo a ni ber mai a, hetiang hian zawhna khal tha tak a zawt ta a ni. Heta Lal Isua chhanna lah hi a bangbo thlak a sin aw; Tih tak meuhin ka hrilh a che u. Siamtharnaah chuan, Mihring Fapa a ropuina thutphaha a thut hunah, nangni mi zuituteho hi, Israel hnam sawm leh hnam hnihte chu ngaihtuahin, lalthutphah sawm leh pahnihah in la thu ve ang a ti a, Petera, thlarau lam mit la keu lo tan chuan tukhum thak lo pui hiah nuah nuah a awl viau ngei ang le.
Hetianga Lal Isua hnung a zuinaah hian mihring mihrinna takin a zui tih pawh a chiang reng a, thih hnu piah lam ram phei chu a suangtuah phak kher pawh a rinawm loh. Nimahsela Lal Isua chu zui tlak tiin a hria a, a zui ta zel a, Lal Isua mantira a awm dawn zanah phei chuan Lal Isua thlavang hauhtu ber niin Joh. 18;10 thu kan chhiar chuan Puithiam Lal ber bawih beng dinglam a sah thlak thu kan hmu a nih kha. Hetiang taka a huaisen hi chuan a mit a var tak tak ta emaw tih mai tur a ni a, a ni hauh si lo. A hnu darkar reiloteah Lal Isua chu phat leh maiin kawngkhar vengtu Nula hnenah chuan Lal Isua zuitu pawh a la inti ngam lo a nih kha. A hnuah pawh vawi hnih phat lehin Lal Isua ngeiin a hnena ‘Ar a khuan hmain nangin vawi thum min phatsan ang’ a tih chu alo thleng dik a ni.
Tichuan, Lal Isua chu khenbehin a awm a, a thih hnuah a ruang chu thlanah phumin a awm a, Ni thum nia a thawh leh hnuin Peterate hnenah chuan a rawn inlar leh a. Lal Isua chuan Petera hnenah ‘Hengte ai hian nangin min hmangaih zawk em?, Nangin kei min hmangaih em?, Nangin kei min ngaina em? tia zawhna pathum lai a han zawh hnuah chuan ‘Mi zui rawh’ tiin a hnungzui turin a ko nawn leh ta a ni. Heta koh nawnna a chan meuhah hi chuan Petera chu Lal Isua rawngbawltu zingah pawh a thawm a ring ber a, zirtir zawng zawng zingah pawh a hotu berah a tang ta hial a ni. Pentecost Nia a rawngbawlna phei chu ropui tak niin mi sangthum lai member thar an nei nghe nghe a. Damlo tam tak a tidam bawkin Pathianin a hmang hle a, hnunglam hawi tawh miah loin Lalpa rawngbawlin a hun zawng zawng a hmang ta a ni.
Petera chanchin atang hian ringtute hian hrinnawn awmzia chu fiah takin kan hriat theih ngei a rinawm a, keini zingah ngei pawh hian hrinnawn ngai hi engemawzat kan awm bawk awm e. Amaherawhchu hrinnawn ngai nih hi a ropui hauh lo a, kan Pathianthuah hian vawi khat kohna atanga an nun puma rawngbawl hi mi chhuanawm tak tak an awm; Mosia, Nova leh Samuela leh mi dang dangte kha vawi khat kohna chhanga Lalpa rawngbawltu rinawm tak an ni. Hrinnawn (koh nawn) an ngai lo a, Pathianin vawikhat a kohna chu ring tawkin Pathian rawngbawltu rinawm tak an ni thei. Thuthlung Hlui huna rawngbawltu zawng zawngte kha vawikhat kohna chhangtute vek an ni a, koh nawn ngai an awm kan hre lo. Chuti chung chuan an rawngbawlna a tha em em a, Pathian pawhin mal a sawm thin bawk a ni.
Vawiin hunah erawh chuan keini chu vawi khat piantharna kan chan hian rei a daih tak tak thei lo a, Camping emaw Crusade emaw hmanga tih harh thar nawn leh hi kan mamawh fo thin hi engnge a chhan ni ang le. Kohhran rawngbawlnaa chanvo zahawm tak tak kan chante ngei pawh hian min thunun theih loh changte pawh a han awm hial thin bawk a, ringtu kan nihna hi engvanga sawi nawn fo ngai nge a nih tak le? Chutih laiin Baptisma chang nawn, Piangthar nawn ngeite pawh hian kan daih rei leh tak tak chuang lo lehzel te hi engnge a chhan ni ang le? Thlarau lam nun ngaih pawimawhna tak tak kan nei lo a, Krista aia Kohhran rawngbawlna kan ngaih pawimawh vang zawkte hi a ni thei ang ngem? Nge, Kohhran rawngbawlna hi silhfen ang maia min thuam mawitu atana kan hman vang hian hrinnawn kan ngai a ni zawk em le. Ringtu nun nghet nei lo, hrinnawn fo ngai ringtu kan nihna hian rual takin min luhchilh mek ni hian ilo hre ve em?
Hawh teh u, Lal hnih rawng a bawl kawp theih chuang si loh avangin kan nih lam lam ni ngam turin i inbuatsaih zawkin mimal leh chhungkuaahte, Kohhran leh khawtlangah leh Politics platform-ah ngei pawh i danglam ngam ila, thih hnu piah lam beisei tute kan nih avang hian damchhung thilte chuan kan ringtu nihna hi min tibuai lul suh se.