Hrisel nan music ngaithla rawh

University of Gothenburg-a mithiam ten zirchianna an neih tharah chuan nitin rimawi (music) ngaihthlak taksa hrisel nan leh nun hlim nan a tha niin an sawi a, music ngaihthlak chuan a ngaithlatu stress level a tihniam thei niin an sawi bawk.
Zirchianna hi volunteer mi 207-ah neih a ni a, heng mi 207 te hi group hnihah thenin, group khata mi te chu nitin minute 30 chhung anmahni duhthlan music ngaihthlak tir thin an ni a, group dang te erawh music ngaithla lem lovin an chawl hahdam thin thung.
Chutianga kar hnih an awm hnuah group hniha mite chu kawng hrang hrangin an endik leh a, music ngaithla thin te chuan a zng zawngin thil an thlir thiam zawk a, an taksaa stress siamtu hormone cortisol level pawh a hniam zawk niin an sawi.
Zirchiannaa an hotunu Marie Helsing chuan, “Music ngaihthlakin hna a thawh dan leh a nghawng dan hi a in ang vek chuang lo nain, a nawlpui thua lakin music ngaithla thin te chuan khawvel hi a zng zawngin an thlir thiam zawk a, an stress level pawh a hniam zawk a ni,” a ti.
Mahse, music hi tawngpawng ngaihthlak a, hmuh remchan apiang ngaihthlak ringawt chuan rah tha a chhuah tehchiam chuang lo niin Helsing chuan a sawi a, “Music-in nghawng tha a neih theih nan chuan a ngaithlatu turin a duh zawng tak leh mawi a tih zawng tak a ngaithla tur a ni a, mawi tih lem loh leh duh zawng ni lem lo ngaihthlak chuan rah tha a chhuah chuang lo,” a ti bawk.