Hrisel nan nitin pumna urh khawpin nuih tum rawh!

Ei leh in uluk leh exercise lak that ang bawkin nuih tlawrh tlawrh hi lung lam natna nei te tan a tha hle niin an sawi.
University of Maryland School of Medicine a mi Prof Michael Miller leh a hoten zirchianna neiin, dul na urh khawpa nuih hian thisen luang vel a tichaka, chu chu lung (heart) tan a tha hle niin an sawi.
Zirchianna neitute hian volunteer-te chu film nuihzatthlak leh rilru ti hah chi an en tir a, chutiang film an en zawh hnua an thisen luan dan vel chu an enfiah leh a, film nuihzatthlak en a, an nuih tlawrh tlawrh hnuah chuan an thisenzam a lian sawt a, thisen a luang chak sawt. Mahse, lungngaihna lam film an en hnu chuan an thisenzam a tê sawt a, lung-a thisen luang lut a tlem phah thung niin an sawi.
Prof Michael Miller chuan, “Nuih zawh hnuah thisen luan dana danglam kan hmuh ang hi miin aerobic exercise a lak zawh hnua a awm dan a inang deuh reng a ni,” a ti.
Miller chuan regular taka nuih tlawrh tlawrh thei chu damdawi tha tak a nih thu sawiin, “Regular taka nuih tlawrh tlawrh theih hian lung a tihrisel thei a ni. Tihian sawi ta ila, chaw tha ei la, exercise la tha a, nitin za takin nui thin rawh,” a ti bawk.