Aizawl khawpui chhunga cable leh internet hrui inzam hnawkte senghawi a, felfai zawka zam chungchangah cable TV aiawhte leh internet pechhuaktu (ISP) sumdawngte kokhawmin G20 Business Meeting Overall Coordination nodal officer, Home commissioner H Lalengmawia hoin sawi a ni.
-- Advertisement --
Thutkhawmah hian Aizawl hmel lanna hrang hrang zinga khawpui chhunga hrui hnawk, a bikin cable leh internet pekchhuahna hrui inzam nasa lutuk hian khawpui hmel a timawi lo tih sawi niin, thla leh maia Aizawla G20 meeting-a palai lokal turten khawpui fai leh thianghlim tak an hmuh theihna’n hengte hi felfai zawka zam a tul tih sawi a ni a. Hemi chungchangah hian hmalakna awm tawhte sawilan niin, hmun thenkhatah chuan Aizawl bawrhsap hmalaknain hrui hman tawh loh senghawi leh la hman mekte felfai taka zam a nih dante sawi a ni. G20 meeting denchhenin hmalak zel dan tur sawiin rawtna te siam a ni.
Tarlan tawh thin angin kumin March 2 hian Aizawlah hian G20 Business Meeting nghah a ni dawn a, inpuahchahna hrang hrang Sub-Committee 9 ten an kalpui mek a ni a. Information & Publicity Sub-Committee pawhin Ningani khan an chairman, Information & Public Relations secretary HM Hualsangi hoin an thukhawm.
Hmalakna chi hrang hrang an neih tawh zingah School Education director kaltlanga zirna in hrang hrang leh Higher & Technical Education director kaltlanga college leh institution hrang hranga zirlaite hnenah G20 chungchang inzirtir a nih tawh thute leh thildang report a ni.