HSLC chunglamah kan tui zawng hriat a ngai tawh – Prof Nunmawia

Matric pass hnu chuan zirlaiten kan tui zawng kan hriat a, kan kalna tur lam kan chian a ngai tawh tih MLA Prof F Lalnunmawia chuan a sawi.
Maubuang High School Managing Board buatsaih HSLC pass lawmpuina hun leh Hualngohmun to Muallungthu Educational Staff Association buatsaih HSLC pass lawmpuina Nilainia neih chu Aizawl South III bialtu MLA Prof F Lalnunmawia hian a hmanpui a. Zirnaah HSLC pass chu a kakpui thleng ang kan ni a, mahni line theuhah kan kal tawh dawn tih sawiin, “In tui zawng in hriat a, in kalna tur in chian a ngai hle. In subject thlan tur pawh uluk a ngai. Tunlaiah pass tawng tawng hian awmzia a nei tawh loa, hlawhtling tur chuan mite aia thawhrim a ngai. HSLC in zawh atang hian in zir leh zelna turah taima zawka zir a, tun aia in tih that chhoh kan beisei dawn cheu a ni,” tiin zirlaite a fuih.
Tunlai khawvelah naupang atanga upa lam thlengin internet leh social media kan buaipui nasa ta lutuk chu hemi kawngah hian zirlaite insum theih a tul hle tih Prof F Lalnunmawia hian a sawi a. Mahni zirlaibu chhiar tam chu hlawhtlinna’n a pawimawh takzet tih sawiin, lehkha thiam thei turin taksa hriselna leh insawizawina lam uar a tul tel tih a sawi bawk.