Kan party policy-ah mipui an lal ber thin – MPCC president

An party policy ah mipui an lal ber thin a, tuna an policy ruahmanah pawh mipui an lal ber dawn tih Congress president Lalsawta chuan a sawi.
Aizawl District Congress Committee huamchhung Block Leaders’ Conference chu Nilaini khan Aizawlah neih a ni a. Hmanpuitu MPCC president chuan kum 2018-a an sawrkar a tlak hnu atang khan han lawm viauna tur chhan an nei lo chungin, sawrkar ta se sawrkar tha an din dawn tih an hriat avangin nghet takin Congress tan an ding tih a sawi a. Rinawm taka an dinngheh tlat avangin mi tha tak tak an party-ah an lut tawh a, mi tha tak tak ten an rawn la belh zel dawn tih a sawi.
“Mi hmingtha tak tak lo lut tawh leh lut mekte hian rawn luh duh chhan an nei a; chu chu kan party policy-ah mipui an lal ber thin a, tun tumah pawh hian an lal ber dawn nia an hriat avang niin kan hria. Heng mi huaisen te zarah leh keini a chhunga mi huaisente zarah hian Mizoramah sawrkar tha kan siam lehna tur kawl a eng niin ka hria a, huaisen taka theihtawp kan chhuah chuan kan sawrkar ngei dawn,” a ti.
Congress party chuan inthlana sum chakna tih bo an tum tlat a, an tum chhan chu an ni aia rethei lehzual zawkte tana thawk tur an nih vang niin Lalsawta hian a sawi. Ram siamthat duh tak tak chuan chu chu an tih ngei ngai a ni a, candidate-te ti hautak lo zawnga ruahmanna an siam a tul tih a sawi a ni.
“Politics-a kan awm chhan hi thil tha tih a ni a, kan thil tha tih tam tak zingah Dr Lal Thanhawla hoa kan din Referral Hospital leh Tuirial Hydel Project ringawt pawh hi ropui tak a ni. Chu’ng chu Congress party in lo thlantlin thin tawh vang a ni a, in zar liau liau a ni,” a ti.
MPCC Media Department chairman Dr Lallianchhunga chuan powerpoint presentation hmangin Congress party manifesto No.1 ‘Tang Puihna’ a sawifiah a ni.