HSSLC top 3-a Mizo tling lawmpui

Kumin Higher Secondary School Leaving Certificate (HSSLC) Examination result tihchhuaha top 3-a Mizo langte chu Mizo Zirlai Pawl chuan lawmpuina a hlan.
Thawhlehni khan MZP Gen. Hqrs. huaihawtin zirlaite hi lawmpui an ni a. Hmanpuitu School Education minister Dr Vanlalthlana chuan zirlai lawmpuite chu an bul tanna a nih avangin an hmabak a la tam, tiin, an hlawhtlin zelnan theihtawp chhuah turin a fuih. An thiamna leh finna Mizoram tana hmang turin a fuih bawk.
“Kan zirlaia thil tangkai vak lo nia kan hriatte pawh hian kan thluak a lo sawizawi a. Thil zir belh zel tur leh hmasawn turin min pui hle a ni,” a ti a. Thiamthil chu tunlaiah a pawimawh tawh avangin, zirlai piahlamah themthiamna neih tum turin zirlaite a chah a ni.
MZP president H Lalthianghlima chuan kan chhehvela kan unaute an ram a buai avangin, an him nan Mizoram an rawn bel a. Hmangaih leh lainatna nen kan dawh hram hram a, kan lo la mikhual hram ham an ngai, tiin a sawi. Zirlaibu a huna sem a ni lo fo chu MZP chuan hriatthiam har a ti a. Mawhphurtu zawng chhuaka hrem an duh tih a sawi a ni.
Zirlai lawmpui tak te hi mipa 5 leh hmeichhia 3 an ni a. Lawmpuina thuziak leh sumfai Rs. 5000 theuh hlan an ni.

Zirlai lawmpuina hlante:
Arts stream
1-na Linden Lalremruatpuia Oikos HSS
2-na Vungnemkim Mt. Carmel School
3-na Rody Lalrotluangi Mt Carmel School
Science stream
1-na Lalramdina Ralte St Paul’s HSS
2-na Lalremruata Ralte St Paul’s HSS
Commerce stream
1-na David Lalhminghlua St Paul’s HSS
2-na Amram Laihnei Hlychho St. Joseph HSS
3-na Vansangkimi Oikos HSS