H&TE hnuaia hna tender tawh tender that leh rawt

H&TE hnuaia hna tender
tawh tender that leh rawt
Mizoram Legislative Assembly hnuaia Committee on Petitions chuan Higher & Technical Education Department hnuaia college thawmthatna atana hna tender tawh chu a enfiah hnu leh department aiawhte a sawipui hnu ah tender that leh turin rawtna a thehlut.
Committee on Petitions hian Assembly speaker Lalbiakzama hnenah “Third Report of Committee on Petitions relating to Higher & Technical Education Department” an thehlut a. He report ah hian PM-USHA hnuaia Govt. Aizawl College, Govt. Hrangbana College, Govt. Johnson College, Govt. Zirtiri Residential Science College, Institute of Advance Studies in Education, Govt. Aizawl North College leh Govt. T Romana College puala cheng nuai 75.79 chuang hu hnathawh tur; Lunglei Govt. College leh Govt. J Buana College puala PM-USHA hnuaia cheng vaibelchhe 8.73 chuang hu; Govt. Lawngtlai College puala cheng vbch. 4.24 chuang hu zirna in thawmthat hna thawk tur tender chhuah tawh chungchanga petition lut kaihnnawih tarlan a ni a. Committee chairman aiawha report thehluttu R Rohmingliana chuan Committee-in ngun taka a ngaihtuah hnu leh department aiawhte koa a sawipui hnuah Committee on Petitions chuan heng hna ho hi tender that leh turin rawtna a siam tih a sawi a ni.
Committee on Petition-ah hian chairman chu T Lalhlimpuia a ni a, member-ah H Lalzirliana, Dr Lorrain Lalpekliana Chinzah, R Rohmingliana, Prova Chakma leh Jeje Lalpekhlua te an awm a ni.