Kuminah ruah tui la tam rih lo

Ruah a sur tluk tluk a, tun hnaiah phei chuan ni tina
a sur chang te pawh a awm. Mahse kuminah ruah tui a tam lua rih lo.
State Meteorological Centre-in an chhinchhiah danin, kuminah June thla thleng khan ruah tui mm 660.6 a tla a, nikumah June thla thlenga ruah tui tla zat chu mm 860.7 niin, kum chanve chhunga ruah tui tla zat hi a intam hleih fu mai.
June thla bikah chuan nikum June aiin kumin June-ah ruah a tam zawk; nikum June thlaah mm 355.3 a tla a, kumin June thlaah mm 381.7 a tla.
Kum chanve chhunga ruah tui tla zatah kumina a tlem hi, kumin May thlaa ruah a tlem vang a ni deuh ber ang; nikum khan May thlaah ruah tui hi mm 327.8 a tla a, kumin May thlaah mm 102.8 chauh a tla.
Kumin hian ruah a sur har a, a sur hnu-ah pawh May-ah a tam lo leh. June-ah erawh a tam ta a, July-ah pawh a tla tha rih.
Nikumah ruah tui a tla hma na a, April thla thlenga chhut chuan nikum aiin kuminah ruah tui a tam; nikum khan April thlengin mm 167.6 a tla a, kuminah April thlenga tla zat chu mm 176.1 a ni.
State Meteorological Centre chhinchhiahna enin, tun hnaiah Mizorama ruah tui tam thla chu July a ni a, August-ah a tam thin bawk. Nikum pawh khan ruah tui tam ber thla chu July a ni a, mm 460.2 lai a tla.
Khawvel sik leh sa inthlakah Mizoramah pawh thlasik a insawn hla hret hret em ni tih ngaihdan a awm a, fur pawh hi a insawn hla hret hret em ni tih ngaihdan a awm. July hnu lamah ruah tui a tam telh telh emaw tih tur a ni.