Huaisen nge Campaigner ?

By Rosangzela, Vh – 8974138026
Kum 2006-ah khan Vaivakawn khelmualah Revival Centenary Lawmna programme hman a ni a, a buatsaihtu Mizoram Synod a nih miau avangin mipui kan tam lo thei lo va. Ni 04.04.06-ah chuan Synod Moderator Rev, Chanchinmawia’n (L) Pathian thuchah khal tak mai a sawi a, amah kha a tang bawk a tunhnu lama Social media-a han thlir leh pawh hian a thahnemngaihna kha a lo ropui thlawt a ni, tawtawrawt ang main a au tuarh tuarh a ni ber. A sermon thupui chu kan hriat tlan vek a ni a, ram chhiatnaa mawhphurtute khak leh kamkhat a ni ber. Mipui lamah pawh a thawk na a, sawizui pawh a hlawh viau. Mipui hmaah “Pastor ka ni a, Sawrkar office-ah ka leng ngai lo” a tih te kha ngaihtuah a ti thui khawp mai. Chu mai ni lovin, “Tuna kan Politics hian kan thlarau nun a do a ni,” tih thu a sawi te kha a huaisen thlak hle. Khami tuma Rev Chanchinmawia (L) thusawi kha tun anga social media chak te chu hmang tawh ila kan comment pui hem hem ngawt ang. Puithiam huaisen tak chu mak danglam tak leh mipui rilru khawih zetin mual min liamsan ta a ni.
|hibeh pha lo heng Revival Speaker te hian, Politics chungchang chu an phak tawk leh hmuh dan tawk te tein Pulpit atangin an tlangaupui ve a. Anni ho thusawi hi chu a nghawng (impact) a na vak lo va, arsa buh chiar hmehpuia lawm tawk kha an ni a, eng ang pawhin au thin mah se, nemngheh (ordained) rawngbawltute thusawi ang ema umzui a hlawh lo. Mihlim kan tih leh zawlnei chi hrang hrangte pawhin Politics chungchang an sawi ve nasa a, chumi khami a lo thleng dawn tiin daitheu turin min au khum a. Pathianin min hriattir an ti thei zel bawk a, tak tak a nih chuan Pathian inpuanna chu a sai sa khawp ang. Tuna kan CM lu chungah meuh kut nghatin mihlim pakhat chu a tawngtai a, CM a la nih zel tur thu a dawng a ni. Chutianga Pathian hriattirna puan a nih laiin midangin Pathian hriattir tiin CM thar kan hmuh tur thu an lo puang ve bawk a, Pathian zahawmna hi kan zawlnei inti leh mihlim inti te hian an man pha lo a ni. Evangelist te, zawlnei chhuak thar te, mihlim vak vel ten Politics bawlhhlawhna an au chhuahpui hi chu barah kan khawn lo. Mahse, Ordained rawngbawltu chin te thusawi hi chu kan ngai thutak deuh a, mipuiah thu tuh chin a awm ve a ni.
Ni 08.05.23 Pathianni chawhnu inkhawmah Rev. Chuauthuama chuan ‘tunlai thil awmzia’ tih thupuia hmangin thuchah a sawi a, a sawina hmun hi Kolasib ah niin KTP General Coference programme kal zelah a ni. |halai sing bi chin hmaa sawi a ni bawk a, social media hrang hrangah a lang nghal chuai chuai a nih kha, ram hruaitute pawh a dim vak lo. Pastor meuhin khatia ram hruaitute a bei ta mai kha mipui ngaihdan hriat chakin media lam an vir sawk sawk a nih kha. Ngaihdan hrang hrang a thlur nghal sung a, thenkhatin a huaisen mange an tih laiin thenkhat ve thung chuan Pastor sawi atan chuan a mawi lo lam hret a ni tih te a ri nuaih mai. Kohhran chanchin kan bih chuan siamthat hnathawk puithiam tamtak an awm a ni, Kohhran siamthat leh Politics siamthat lamah sulhnu hrawlpui pui nei an awm nawk mai. Kan sawifo angin Kohhran hruatute hian ram inrelbawlna Politics hi in-direct taka thunun dan an dap niin a hriat, Pastor Chuauthuama thusawi “ti tia distinction “ tih tawngkam te kha thu dik a nih rualin Politician-te siamthatna atan a tling zo em? nge ram hruaitu mipui nuihzatbura chhuahna mai mai zawk. Puithiam pension ten Political Party thenkhat an khak hian mipui lam chuan Party awn lam nei ah kan ngai fo, Hindu Nationalist Politician Baba Ramdev a organisation-in kum 2014 vela Modi atan an campaign ang lek kha a ni palh ang tih a hlauhawm hlel lo ve, berampu campaigner hmuha hmu te pawh awm theih a ni. Kan Puithiam te hi an fimkhur a va tul em! Kohhran ho thlarau nun chawm turin taimak chhuah se a tawk viau mai.
Ni 10 – 12 February 2023-ah khan Hnahthialah Mizoram Baptist Mipa Pawl inkhawmpui a awm a, Rev. R. Lalbiakliana chuan, “Ram leh hnam tan min ti harh rawh” tih thupui hmangin thuchah a sawi a. Kohhranin sum kan hman dan ang hian sawrkar hian hmang sela, kan ram chu khitah kan awm ang” tih thu tawngkam khatin a sawi a, chu mai ni lovin “Baptist Church of Mizoram hi term khat ram min enkawl tir ula kan siamtha ang” a tih te kha a ropui khawp mai. Kan ram chhiatzia tiin Nehemia ang a tungding leh turin chet chhuah a tul tih thu sawi a ni thin, heti tak maia ram hruaitute duhkhawp lohna a rik lai hian roreltute chu Pathian min pek tiin kan sawi leh si a, chumai ni lovin roreltute thu thuin awm rawh u kan inti leh bawk a. Pastor ho zingah ram leh hnam vei tak tak an awm lai hian, Pastor nihna hmatheha sawrkara tlaktlum tum an awm tih thawm te pawh a ri ve fo mai. Dawhsan (Platform) atang hian huaisen tak leh thu khal tak sawiin au au thin mah se, hruaitu tha kan neih hma loh chuan eng kan ang lovang. Napolean-a khan “sakeibaknei za awmin an hruaituah ui awm sela, indona ah ui angin an thi ang. Ui za awm sela, an hruaitu sakeibaknei a nih chuan indona ah sakeibaknei angin an thi ang.” Ram leh hnam tan hi chuan kan harh reng mahse, kan thawhchhuahpui lo mai zawk a ni.
Salvation Army (Chhandamna Sipai Pawl) a hruaitu Dr.Major. J. Thanruma thusawi kha kan la hre theuh ang, MNF Official Programme ah Mizo National Revival tih thupui hmangin thuchah a sawi a, hemi tum hian a thusawi darhzau em em a awm a, “Kohhran hruaitute leh Politician te hian ram kan tichhia a ni” tih hi a ni. A thusawi hi mipui lam chuan kan ei tlang hle a, a dem zawnga comment pe zui pawh a awm lo. Chutih laiin, a rawngbawlpui Kohhran hruaitu thenkhat chuan an helh ang reng hle, inthlan kum a nih miau avangin ram vei thar thut mi tam tak an awm a, ram chhiatna hi mipui chunglam atanga bul tan niin mipuiah hlet a chhuah chauh a ni. Mizo mipui hi kaihhruai nuam tak kan ni a, roreltute lakah han lungawi lo thin mah ila, ban phartu an awm chuan kan inrem leh mai thin. Heti khawpa hnam enkawl nuam kan nih lai hian ram rethei leh pachhe takah kan la awm cheu, eng vang nge? A chhanna chu Dr.Major.J. Thanruma thusawi ang hian tisa lam hruaitute leh thlarau lama hruaitute khawsak dan dik loh vang a ni ngei ang.
Kan sawi fo angin inthlan kum hi chuan berampu atanga beram bo thleng hian politics-a party thu kal lam haw lam ngaichangin kan awm a, kumin kum chanve chhung lek pawh hian induhkhawp lohna leh inchirhthehna thu leng vak a tam tawh hle a. Kum 2022-ah voters 8,33,426 awma ngaih kan ni a, ni 09.11.23 ah khan Draft E Roll tih chhuah leh niin voters 8,31,272 kan nia tarlan a ni. Voters nuai 8 chuang hret bumin kan awm leh ang tih hlauvin mi thahnemngaite kan au chhuak phawng phawng a, engngemaw te chu a herchhuahpui mahna. Kohhran lama nemngheh rawngbawltute pawhin thu an sawi hnem tawh hle a, huaisen tak tak au te pawh an awm a ni. Mahse, Party nek nat deuh an neih hian mipuiah zawhna a siam fo, ani hi chu a MNF ru riau a sin, a ZMP ru riau a sin, Congress lam a awn deuh lo maw? tiin kan judge tho tho.
Kohhran hruaituten politician-te dim lo taka an chilh sak sak lai hian, seasonal politician pakhat ka interview chuan heti hian chhanna a pe a, chu chu “keini politician te hian kan sakhaw hruaituten khawvel thil an duhzia te, minister office-a rawn kal fo te, an nihna hmatheha an duhsak zawngte hnaa thun tura min nawr dan te, an enkawl Kohhran mipuite lungawi lohna te hi Pulpit tlang atangin sawi ve ta ila an lawm emaw chu?” tiin. Ngaihtuah a ti thui khawp mai, mahni mita khanchhuk awm si a, midang mita hmawlh te tak te awm ngaimawh viau si tihna a ni ber ang chu. Kohhran nge siamthat ngai politics tih hi buk dawn ta ila, a i buk tawk fu lo maw. Chakai nufa kal inzirtir ang chauh hi kan ni ti ila a na lutuk lo ang chu maw. Ram kalphung siamtha turin Political Party kaltlang lovin a theih loh, Arvind Kejriwal-a pawhin ram siam tha tak tak tur chuan Politics-a party kalpui a tul tih hriain AAP din a ni ta a ni. Kohhran hruaitu a bikin Pastor level atanga ram chungchang au chhuahpui tute hi an huaisen vang nge indirect Campaigner? Mi sawi chhuah ngam loh ka rawn sawi a ni ber e.