Huan lo ram tihchhiat zangnadawmna NHIDCL-in a la pek loh te nawrsak

National highway kawng zauhna avanga Thingsul Tlangnuam leh Keifang amite huan lo ram a tihchhiat sak zangnadawmna chu tun thlengin a la pe lo.
He thil hi pawl pakhat, Centre for Environment and Social Justice (CESJ) chuan a bawhzui sak a. Thingsul Tlangnuam leh Keifanga chhungkaw 46-te leilet, lo leh nul bakah sangha dil engemawzat NHIDCL lei laih vungin Tuirini leh Kaihzawl lui/ Zawlzaua a tihchhiatte chu tun thlenga compensation a la pek loh avangin hma an la a. NHIDCL leh heng chhungkaw 46-te hi inremna thu ziahpuiin an lo leh dil chhia chu a hmuna an endik hnuah compensation pek an nih tur thu hrilh an ni.
Seling to Champhai NH-06 kawng laih meka leivung paihna, Muck Disposal Plan/ Spoil Bank mumal a awm loh avanga kawngthlanga leivung an nawr liam zel chungchang NHIDCL hotuten thu dik lo an pek bakah CESJ-in a zawhna te an chhan pial zel avangin thinrimin an inchhuahchhal tih an sawi.
Heng hmalaknaah te hian a tul a nih chuan court-ah pawh thlen chhoh zel an tum tih an sawi a ni.
‘NHIDCL-in Mizorama national highway siam leh laih hna a thawh zawng zawngah environment dan leh hrai zawm miah lo leh a ram leilung fate zahna nei loa an tihsual thup an tum leh, dik taka thil an tih duh loh avanga loneitute thlenga an tuar zel hi kan dem takzet a ni,’ CESJ hian an ti.