Hulhliap thawh thumna Aug.25-ah

Ruahmanna felfai zawka ruihhlo ngaih tih tawp tir tuma beihna Hulhliap-Short Stay Centre thawh hnihna an chhuak a, a thawh thumna hi August 25 atang khian neih leh tum a ni.
Mizoram sawrkar, kohhran leh tlawmngai pawl tanghoa ruihhlo ngaite nghei tur tuma beihna bakah ruihhlo kalsana mahnia ei zawng thei tura ruahman tumna Hulhliap-Short Stay Centre thawhkhatna hi kumin June – July inkar khan neih a ni a, mi 500 vel zel enkawl tuma ruahman ni mah se, hei aia tam fe hi lut tura nawr luh an ni a, a tawp thleng thei erawh mi 119 vel an ni. A thawh hnihna hi kumin July 21 khan tan niin, August 9 khan an chhuak a ni. A tirah mi 548 an lut a, a tawp thleng thei chu mi 248 an ni.
Synod Revival Camping Centre Neihbawiha Hulhliap neihah hian, a lutte hi damdawi hmanga enkawl hmasak niin counseling nen uluk taka kalpui a nih hnu ah Synod Revival speaker-ten Pathian thu-in an hruai leh a ni. Camper-ten camp an chhuahsan hnu hian volunteer/ counselor ten an vil zui anga, thiamthil zir duh an awm chuan hma lakpui tum an ni. Centre-a awm zui duhte chu dah luh an ni bawk.
Hulhliap camping chhawng thumna hi kumin August 25 atanga tan leh tum a ni.