Hun harsa thlen dawnin MNF kan sawrkar thin – Zoramthanga

Hun harsa thlen dawnin MNF kan sawrkar thin
– Zoramthanga
Ramin hun harsa a tawh dawnin Pathian-in MNF a sawrkar tir thin a. 2028 inthlanah MNF tlinpui kum a thlen a ring tih MNF president Zoramthanga chuan a sawi.
Zirtawpnia Mizo Hnam Run inkhawmah MNF president chuan, hun harsa thlen dawnin MNF chu Pathian-in sawrkarna a pek thin niin a sawi a. Mautam, economics crisis, kangmei, vawk pul, Covid-19 leh Assam nena ramri buaina a thlen dawna an sawrkar thin chhan a ngaihtuah thin tih sawiin, “A hun taka che thin Pathian hi a tlai sual palh ngai lo. In chhelin, in nun in chhanhim ang, tih thu vuan tlattu kan ni tur a ni. Harsatna paltlanga huai taka pen zel tura Pathianin a chherhriam kan ni a. Inthlan awm tur 2028 ah chuan MNF tlinpui kum a thlen ka ring a; thlamuang takin awm ang u,” a ti.
Kum 2023 inthlanah ZPM thlipui a tleh a, a thawm pawh a la reh mumal loh lai karah an thawhhona, tanrualna leh inpekna Lalpa’n mal a sawm a. An MLA Pu Lalrintluanga Sailo hmun ruak luah tura MNF senior vice president Dr R Lalthangliana thlantlin a ni chu an lawm takzet tih a sawi a ni.
Dampa bial by election-ah invauna leh intihthaihna nen, thlemna nen CM hoin an bei a, an hotupa ber chuan Election Commission of India atangin yellow card a hmu phah tih Zoramthanga hian a sawi.