Hun hnuhnungah Barca tlawm leh Thlahna goal khungtu Benzema

Hun hnuhnungah Barca tlawm leh
Thlahna goal khungtu Benzema
An champion hnua chak ni hmel hmu thei ta lo Barcelona chu Spanish La Liga season tawp ni Pathianni khan Celta Vigo khelmualah 1-2-in an tlawm leh a; a zawnin season 12 chhunga Spanish top flight-ah Celta an inhamtang.
Gabri Veiga chuan Celta Vigo chakna goal hnih thawhin, a goal hmasa zawk hi chawlhlawk dawna a tihluh niin, a goal hnihna hi 2nd half tir lama a thun a ni thung.
Ti hian, kum 21 mi Veiga hian league goal 11 thun chungin season a khar a, a team chu himpuiin, point thumin relegation zone chungah a team a hlangkai a, table-a 13 luah chungin Celta a himpui.
Catalan team goal neihchhun hi second half minute 79-a kum 20 mi Spain forward Ansu Fati tauhluh niin, Barca tlawmna erawh a pumpelhpui zo lo.
Espanyol hneha kum 2018-19 season hnu lama league title an lak hnua game li an khelhah vawithum Barca an tlawm.
Mikhual Getafe nena goal awm loa inhnehtawk Real Valladolid chu 18-naah awmin an tla chiah chiah a; an hnuaia indawt thla Espanyol leh Elche-te’n season tharah division hniam zawk an khel bawk ang.
Valladolid hi season liamtaa La Liga kai chho ve chiah kha niin, season khat hnuah Spain second tier lamah an tla leh nghal a; season tawp ni thlen hmain Espanyol leh Elche an tla fel tawh thung.
Real Madrid 1-1 Athletic Bilbao
Season thara club dang zawm ve tawh tur Karim Benzema chuan Bernabeu club tana a inlan tawpna berah Real tlawm tur chhanna goal second half minute 72-ah penalty atangin a chhuihlut a, Spanish giants tan belhkhawma goal 354 a thun tlinna chiah niin, he club chanchina goal khung hnem ber dawttu a ni.
Mikhual Bilbao lamin bul an tan fuh zawk a, minute 10-na lekah Mikel Vesga chuan Toni Kroos handball hrinchhuah penalty petin, Belgium goalkeeper Thibaut Courtois chuan a dansak a; goal awm loin first half a zo.
Second half-ah pawh mikhual team lam bawkin bul an tan hlauhawm leh zawk a, minute 49 an khelh tlin rualin Oihan Sancet chuan hnai set sawt atangin Athletic Bilbao hmahruaina goal a thun a; tarlan tak angin, Real Madrid tana a inlan tawpna berah French forward Benzema chuan hun harsa team-in a tawh laia a lo tih thin tawh angin a team tlawm tur a chhan leh a, a goal thun tur penalty hlawhchhuaktu kha Eder Militao a ni.
Pathianni khan Real chuan an kianga kum 14 zet khawsa tawh Benzema chhuah tur thu an nemnghet thut a, kum 35 mi hi Saudi Arabia lam pan tura sawirik zui nghal a ni.
Spain leilunga Champions League title panga leh La Liga title pali la tling France striker Benzema hi minute 74-ah Luka Modric chuan a thlak a, khelmual a chhuahsan laiin home supporterte’n zahna chibai (superb ovation) nen an mihrang kalbo tur an thlahliam.
Kumin nipui thawt lai hian Real Madrid tana kum riat khel tawh Marco Asensio pawh a chhuak ve dawn a, ani pawh hi hun pekbelha thlak a nih laiin Benzema an thlah ang bawk hian mipuiin zahna leh thlahna chibai an hlan ve bawk.
June ni 30-a chhuak ve tur Chelsea forward hlui Eden Hazard erawh substitute bench lamah a thu tluanchhuak a, farewell match a khel ve ta lo.
Real Madrid hian La Liga champion thar Barcelona hnuai chiaha pahnihna ni chungin season an khar.