Nikum Krismas leh kumin kumthar hun lai khan sawrkarin halpuah lam chi leh khapna dang a siam zawm lo mi 14 chu police-in an man a, case 11 ziahluh a ni. Kuminah khapna thupek zawm lo hriaten police an hrilhhriat theihna tur tihchhuah a ni.
Aizawl SP chuan hriattirna tichhuakin, mipui him tlan theih nan leh Krismas leh kumthar hlim taka kan hman theih nan hunpui vuakvetah halpuah leh silai lem a mu kap chhuak thei khapna thupek district magistrate-in a chhuah thin chu mi tam zawkin kan zawm that viau laiin, khapna thupek zawm loa dan bawhchhia an awm thin tih a sawi a. Chutianga dan bawhchhetute lakah chuan a theih ang chin chinah Mizoram Police chuan hma la in hrem an nih theih nan an lakah case siam thin a ni tih a sawi.
Nikum Krismas leh kumin kumthar vuakvetah khapna thupek zawm loh chungchangah section 188 IPC hnuaiah case 11 ziahluh niin heng case kaihhnawihah hian mi 14 man an ni a. Heng mite hi court-in thiamloh chantirin hrem nan pawisa a chawitir tih a sawi a ni.
‘Sawrkarin thupek a chhuah zawm loh avang hian awlsam tea thubuai neih theih a ni a, harsatna tam tak min siam thei a. Aizawl District Police chuan mitinin Krismas leh kumthar him leh dam taka kan hman theih nan sawrkarin khapna thupek a chhuahte zawm theuh turin mipui kan ngen a ni,’ SP hian a ti.
Khap a nih hun chhunga halpuah leh silai lem a mu kap chhuak thei hal/hmang emaw kawl emaw hmu chuan heng phone number-ah hian whatsapp-in thlalak leh video thawn turin mipui an ngen tih a sawi a. Aizawl PS – 8794747291, Bawngkawn PS – 8794747292, Vaivakawn PS – 8794747293, Kulikawn PS – 8794747294, Zonuam OP – 8794747295.
Hunpui laiin Aizawlah khapna zawm lo 14 man
Get real time updates directly on you device, subscribe now.
Next Post