HUNTRIX “Golden” a la hlu ber

KPop Demon Hunters soundtrack HUNTRIX “Golden” chu Billboard Hot 100 (US singles) chart-ah a No.1 a, he chart-a kar thum a No.1-na a ni ta a, hetihrual hian chart top five-a hla pathum chu KPop Demon Hunters soundtrack niin, top 10-ah hla pali a nei thei bawk.
HUNTRIX (EJAE, Audrey Nuna & REI AMI) “Golden” hi he chart-a No.1 a rawn nih hlim khan K-pop nena inzawmna nei, hmeichhe group zinga he chart-a No.1 kai thei hmasa ber an ni a, tun kum 24 chhunga hmeichhe hlang group member pathum chin awmnaa he chart-a No.1 ni leh thei hmasa ber an ni bawk a, 2001-a Destiny’s Child ‘Bootylicious’ hnuah rawn ni leh thei hmasa ber an ni.
KPop Demon Hunters soundtrack pathum chu tunkar Hot 100 chart top five-ah an lang thei a, hetiang dinhmun hi a zawnin kar hnih an ni ta a, 1978-a Saturday Night Fever soundtrack pathum chart top five-a a ruala an lan hnuah soundtrack zinga hetiang dinhmun rawn thleng leh thei hmasa ber a ni bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre U.S. streaming (official audio leh official video), radio airplay leh sales data te chu tehna pawimawh a ni.
HUNTRIX “Golden” hian stream maktaduai 35.3, radio airplay ngaithlatu maktaduai 19.7 leh sales 9,000 nei lehin, hei hi a kar thum nan chart-ah a No.1 pui leh ta a ni.
‘Golden’ hi K-pop hla he chart-a No.1 kai thei pakuana niin, HUNTRIX singer EJAE leh REI AMI te hi Seoul, South Korea a piang an ni a, Nuna hi New Jersey a piang a ni ve thung a, K-pop nena inzawmna nei hmeichhe lead vocalist zinga he chart-a No.1 nei thei hmasa ber an ni bawk. He chart-a K-pop hla No.1 kai tawh pakua zinga paruk chu BTS hla niin, he group member Jimin leh Jung Kook ten soloist angin pakhat ve ve an nei tawh bawk a, HUNTRIX-in pakhat an nei ve leh ta bawk.
He chart-a kar 10 No.1 ni thei Alex Warren ‘Ordinary’ chu No.2-ah bawk awm lehin, chart No.1 hlui tho Morgan Wallen ‘What I Want’ featuring Tate McRae chu No.3-ah a la awm bawk.
KPop Demon Hunters soundtrack Saja Boys ‘Your Idol” leh Saja Boys “Soda Pop” te chu No.4 leh No.5 a ni.
Ravyn Lenae “Love Me Not’ chu No.6-ah bawk la awmin, chart No.1 hlui Sabrina Carpenter ‘Manchild’ chu No.14 atangin No.7 a kai thar leh a, he hla hi a parent album ‘Man’s Best Friend’ an tlangzarh avangin hralh a kal thar leh ta a ni.
Chart No.1 hlui Teddy Swims ‘Lose Control’ chu No.7 atangin No.8-ah a tawlh a, he hla hi chart-ah kar 108 lang tawhin, he chart-a lang rei thei ber a record a siam zel a, top 10-ah kar 76 lang tawhin, top 10-a lang rei record a siam zel bawk.
KPop Demon Hunters soundtrack HUNTRIX “How It’s Done’ chu No.9 niin, chart No.1 hlui Lady Gaga leh Bruno Mars ‘Die With a Smile’ chu No.11 atangin No.10 a kai thar ve leh ta bawk.