Hydel project tenau outsource tum anih danah rinhlelh kan nei – Congress party
Hydel project tenau outsource
tum anih danah rinhlelh kan nei
– Congress party
Mizorama hydel project tenau ho zingah sawrkarin hlawkna a tel reng chung leh sawrkar laipuiah pawh heng hydel project ho tih changtlunna tur a bawhzui reng laia company kuta ‘outsource’ a tum tlat chu rinhlelh an nei tih Congress party chuan an sawi.
MPCC Political Affairs Comittee chairman TT Zothansanga sawi danin, ZPM sawrkarin kumin February 13 khan hydel project 8 chu outsource turin thutlukna a siam a; heng zinga thenkhat hi chu a enkawlna man leh power a siamchhuah chhuta sawrkarin hlawkna a la tel reng lai leh P&E department pawhin an la ui ngawih ngawih a nih laiin, kum 25 chhung atan Kundan Green Pvt Ltd hnenah a enkawl hna hlanchhawn (outsource) a tum tih a sawi.
Hlanchhawn tura an tihfel tawh thu an sawi hnu daih hian, Assembly Session-a zawhna an chhan danah sawrkarin thuamthat a tum zingah an la tel leh tho si nia a sawi bakah tunhnaia Power minister conference-ah P&E minister-in hmarchhaka hydel project tenau ho tihchangtlunna atan sawrkar laipuiin tanpuina a pek theih chu rang zawka bawhzui tura a ngen thu a sawi leh bawk tih a sawi a ni.
P&E department chuan heng hydel project hi an la enkawl theih thu an sawi bakah hydel project-a thawktute pawhin engtin zel nge an dawn tih tun thlengin hrilh an la ni ngai lo tih a sawi bawk.
“Kundan Green hnena outsource hi chief minister hian a duh tlat niin a lang a. Assembly Session-ah phei chuan pheichham an man a ni ringawt, tiin a sawi a. Ram tana pheichham nge a tan pheichham a man tih hi kan zawhna a ni,” TT Zothansanga hian a ti.
Outsource tum thu hi MPCC president Pu Lal Thanzara’n a lo sawichhuak tawh avangin, inhlan mai ngam loin, mawihnai taka kalpui zel a nih theihnan competitive bidding awm thei turin, Kundan Green Pvt Ltd tinzawn chungin tender an chhuah leh hnuhnawh nia an hriat thu a sawi a. He thil hi chu sawrkar hian kaltlangpui lo hram se tih chu an ngenna a ni tih a sawi.
MPCC PAC hruaitu chuan, Congress party kum 22 sawrkar chhungin hydel project-ah megawatt 83.05 siamchhuak thei an din hman a; PC sawrkarin kum 5 chhungin Mw 2.05 pechhuak thei an din a; MNF sawrkarin kum 17 sawrkar chhungin Mw 15.5 pechhuak thei an din hman tih sawiin, ZPM sawrkarin hmasawnna ruhrel dang ang bawkin a hralh lam an buaipui leh ta tih a sawi a ni.