Hydro Electric Project siamna tur DPR 5 centre-a thehluh theih awm

Hydro Electric Project siamna tur
DPR 5 centre-a thehluh theih awm
Mizoram sawrkar chuan tui chakna hmanga kawlphetha siam theihna tura rawtna, Hydro Electric Power project detailed project report siam zawh tawh, sawrkar laipuia thehluh theih mai tur 5 a nei.
Larsap Hari Babu Kambhampati chuan Thawhtanni khan Raj Bhavan-ah Power & Electricity department hotute a kawm a. Tuiluang chakna hmanga kawlphetha tam tham zawk Mizorama siamchhuah dan chungchang an sawihoin, P&E official-te commissioner & secretary H Lalengmawia’n a ho a. Powerpoint presentation pe in, department-in a siam zawh tawh leh a kawl mek detail project report 5 leh project dang 4, investigation kalpui mek te an sawifiah.
Larsap chuan tunhnaiah Mizorama luiluang khuah theih hmanga kawlphetha siamchhuah chu Prime minister Narendra Modi a sawipui tih a sawi a. Prime minister chuan tha takin a lo ngaihthlak sak thu leh state level-ah lo enfiah hmasak a nih hnu ah a tul dan azira hma lak tha a tih thu a lo hrilh tih a sawi. Mizoramah kawlphetha siamchhuah tur tam tak awm mek chu hman tangkai thuai nise tha a tih thu sawiin, P&E hotute chu thil awmzia a zawt a ni.
DPR siamsa awmte chu tha thawkhat nia a ngaih thu sawiin, Ministry of Power lam sawipui hmasa phawt turin P&E hotute chu thurawn a pe a. Hemi hnu hian DPR neihsa te chu Prime Minister Office (PMO) ah Power secretary leh a thawhpuiten presentation tha taka siamin thehlut se tha a tih thu a sawi a. Kawlphetha siamchhuahna atana power plant siamna’n sum tam tham hman a ngaih avangin central PSU lianzawkte pawh thawhpui dan zawng turin P&E hotute chu thurawn a pe a ni.
P&E hotuten powerpoint presentation an pek dan chuan tunah hian DPR siam zawh vek tawh 5 – Kolodyne -II HEP (Mw 460), Tuival HEP (Mw 210), Bairabi Dam Project (Mw 80), Tuirini HEP (Mw 24) leh Tuivawl HEP (Mw 24) te an ni a. Project 4 dang – Tuipui HEP, Tuichang HEP, Mat Sekawi HEP, leh Tlawng HEP te pawh kalpui theih a ni em tih enfiah mek a ni bawk.
Tunah hian Mizoramin kawlphetha a mamawh zat atanga tam tam tak chu state pawn atanga lei a ni a. Heng power plant – AGBPP (NEEPCO), AGTCCP (NEEPCO), Baramura -IV (TPGL), Baramura -V (TPGL) leh Palatana Plant atangin kumtin cheng vaibelchhe 400 vel sengin lei thin a ni.
Larsap hoa thutkhawmah hian nizung chakna hmanga kawlphetha siamchhuah belh theih dan pawh sawi tel a ni.