Minister-in chakai farm enchhinna tlawh

Minister-in chakai farm enchhinna tlawh
SEDP pilot project hnuaia Kolasib Dumluia ‘Chakai Demonstration Farm’ kalpui chu Thawhtanni khan
Fisheries minister K Lalrinliana’n a tlawh a. Fisheries secretary Laldawngliana leh director F Vanlallawma ten an tawiawm.
Minister chuan lui sa zinga Mizote ngaihhlut leh ngainat chakai chu thianghlim leh hnianghnar zawk tharchhuah a nih theihna’n SEDP pilot project hnuaiah Chakai Demonstration Farm kalpui a ni, tiin, enchhinna hi a hlawhtlin chuan luidunga nungcha humhalhna’n hmanraw tangkai tak a nih dawn bakah chakai farm siam chu eizawnna tlaka a hman theih tur thu a sawi.
Dumluia Chakai Demonstration Farm tlawhnaah hian chakai dah luh zingah no pai mek hmuh a ni a. Minister chuan chakai note te hi hlawhtling taka enkawl chhoh an nih chuan Chakai Demonstration Farm hnuaia hmalakna chu hlawhtling thawkhatah a ngaih theih thu a sawi a ni.
Chakai Farm enchhinna chuan hlawhtlinna nasa zawk a hmuh zel theihna’n a viltu department leh a hmun enkawltute chuan tih takzetna nen thawk zel turin minister hian a chah a. He enchhinna hi a hlawhtlin chuan ei leh bar intodelhna kawnga mel lung pawimawh tak a nih tur thu a sawi bawk.
DFDO Kolasib tarlan danin, Chakai Demonstration Farm hi enchhina leh zirchianna a nih angin, a tum ber chu cemented pond /tanks a chakai vulh theih dan, an inthlahpun dan, an than dan leh dam leh hrisel taka vulh an nih theihna’na an thil mamawh hrang hrang zirchianna atana kalpui a ni a. June leh August 2021 inkar leh March 2022 khan hmun hrang hrang atanga chakai lakkhawmte dahluh niin, Fisheries department leh ICAR-a mithiamten a huhoin an endik tawh a ni.