I-Day Football Tournament

On Aug 1, 2024 19 0

I-Day Football Tournament
Rajiv Gandhi Stadium, Mualpuia GIG Motors I-Day Football Tournament nimina khelh tan takah Nilaini khan inkhel vawihnih awmin, match hmasa zawkah Chanmari FC chuan 2-1-in SYS FC
an hneh.
I-Day Football Tournament-ah hian MPL team pariat bakah Bethlehem Vengthlang FC leh North East United FC an tel a ni.
Nimin inkhel hmasa zawka goal hmasa ber hi first half hun tawp dawn minute 41-a lut niin, Chanmari FC tan Dawngtea chuan penalty atangin a khung.
Second half tan hnu lawk minute 52-ah Chanmari FC midfielder Rokima chu double yellow vangin hnawhchhuah a ni. A tam zawk SYS an vannei zui a, minute 59-ah Isak-a penalty hlawhchhuah chu Duhawma’n goal-ah chantirin an siphurh a rul.
Team pahnihte hnehna chan zawk tuma an innawrtawn zak zak hnuah Chanmari FC chuan an hun tha neih hmangtangkaiin minute 86-ah Nunzira chuan box pawn chiah atangin mawi takin an goal hnihna a khung a khung a; SYS lamin an siphurh hi hun tawp thlengin an sut thei tawh lo a, Chanmari FC-in hnehnain bul an tan.
Ramhlun Athletic FC 5-2 Bethlehem Vengthlang FC
Inkhel hnung zawkah MPL club Ramhlun Athletic FC chuan 5-2-in first division club Bethlehem Vengthlang FC an hneh.
First half-ah goal nga lai a lut a; Ramhlun Athletic FC tan Richard Lalramnunpuia chuan goal hnih khungin Felix Lalruatsanga leh Benjamin Lalrinliana’n goal khat ve ve an khung bawk.
Bethlehem Vengthlang FC tan Zothansanga chuan goal khat a khung ve bawk.
Goal hmasa ber hi Ramhlun Athletic tan Felix-a chuan minute 27-ah a tilut a; minute 10 chhungin goal thum a lut zui leh a, Benjamin Lalrinliana’n goal khat a khung belh hnuah Richard-a’n goal hnih a tilut zui leh bawk.
Second half-ah goal hnih a luh belh thung. Inkhelh tan atanga minute 76-ah Ramhlun Athletic tan Lalramdinsanga chuan box pawn veilam atangin mawi takin a thun.
Bethlehem Vengthlang an inthlahdah bik lo. Hun tawp dawn minute nga la awmah Lalringngama chuan mual dinglam sir atangin an goal hnihna khung mah se an siphurh sut turin hunin a daih tawh lo a, Ramhlun Athletic FC an chak ta a ni.