I ngaihzawng neih kha a hautak riau em?

I ngaihzawng neih kha a hautak riau em?
Sumin hmangaihna tak tak a lei thei lo tih chu a dik ang, mahse, romantic deuh taka han chet tak tak dawn chuan sum tlem azawng chu a lo ngai ve leh tho thin a ni lawm ni? Romantic taka hmun nuam deuha zanriah ei dun te kan lo chak a, khawiah emaw han zin khawthawn dun te kan lo chak a, restaurant changkang deuha chaw chhun ei dun zeuh zeuh kan duh phei chuan, rin aiin sum bawm a thêp duh ve riau. In inngaihzawnnaah chuan in serious viau a ni emaw, a vawi khat nan zanriah eiturin in chhuak dun emaw a nih pawhin, in inngaihzawnna boruak tichhe chuang si lo a chet hautak loh deuh dan hriat a pawimawh ve riau a ni. Tun tumah hian relationship lama mithiam ten inngaihzawnna hautak lo zawka awm theih dan tur ni a an sawi te kan rawn tarlang e.
1. Zan hnih khat atana in-date zuai ni lo, serious pui deuh tura i ngaihzawng a nih chuan i sum dinhmun sawipui kha a pawina a awm reng reng lo. I ngaihzawng chu a sum hman a na riau a nih chuan i wallet-in a tuar deuh dawn tlat. Chuvangin, sum leh pai lama i dinhmun a hriatthiam theih nan titi pui mai kha a pawi lo a, zah leh tlawmah lak tur a ni lo. Duhtawka sum hman tur i nei a nih chuan thudang a ni a, chutiang ni lem lo a, budget sang vak lo a khawsa ve tho i nih si chuan in inkar boruak a that zawk theih nan hetiang chungchang sawi hi a finthlak zawk a ni.
2. Kum zabi 21-naah kan awm tawh a, mipa chu a insengso zawk tur, thil tihna leh leh thil eina man zawng zawng pawh petu tur anga ngaih hunlai ang kha a ni tawh lo tih hmeichhia te pawhin hriat tur a ni. Hmeichhia te pawhin sum kan thawkchhuak nasa tawh a, mipa aia thawk chhuak tam zawk pawh kan tam tawh ang. Kan thil eina leh thil leina te in tum sem kha mipa tan pawh zah leh tlawmah lak tur a ni lo a, hmeichhia pawhin, thawh ve nachang hriat tur a ni. I ngaihzawngin hetianga thawh ve tumna engmah a nei ngai lo hrim hrim a nih chuan a hmangaihna tak zet che em tih kha ngaihtuah nawn ve ang che.
3. I sum lakluh mil tawkin thilpek pe thin rawh. Kan hmangaihte chu thil tha leh manto tak tak pek te kan chak thin, chutih rualin kan phak tawk anga kan chet thiam erawh a pawimawh a, kan phak baka thil tha leh manto pek kan chin hian a hnu lehzel atan an beiseina kan tisang a, kan tan phurrit a nih phah zawk thei. Thilpek chu a hlutna hi a man to leh to loh lama teh tur a ni lo; i ngaihzawng chuan chutiang thil pe thei tura i buaina leh i pek duhna thinlung kha a lawm zawk dawn a ni. Thil siam sa man to tak tak a lei a inpek ai chuan nangma kut kawih ngeia i thilsiam te kha han pe chhin teh, i rin aiin a ngai hlu ang. Chutiang ni lo a, i thilpek chu a man atanga a hlutna teh chi a nih chuan, nangmah aiin i sum a hmangaih zawk tihna a ni ang.
4. Hmu changkang tak taka in-date kher a ngai lo. In chhuah dun apiangin restaurant changkang leh thil man tona hmuna chawlh ziah kher a ngai lo. A chang chuan inpahnih khan in eitur te siam dun ula, nuam inti zawk ngei ang. Hmangaihna hi hmun changkang leh sum sen tamna hmunah chauh a awm lo tih hi hriat tel tur a ni. Chutih rualin hetiang hmunah te kal loh tawp tur tihna erawh a ni lo a nia.
5. Tu emaw nen a vawi khat in in-date a nih chuan ei leh in lam tih vak ai chuan coffee date vel kha a tawk fû a nia. A vawikhatna hi chu titi phungleng han sawi dunna leh, a hnulamah kan la inhmu zui duh ang em tih inbelhchianna ang vel a ni.
6. Hei hi hriat reng tur, i ngaihzawng chuan i sum leh pai dinhmun tlang taka i hrilh a, a lawm vak lo a nih chuan ani chu i ngaihzawn loh law law a fuh zawk ang. Inngaihzawnna, inchhai vel hi a nuam viau, chutih rualin i sum leh pai te pawh awmze nei taka i enkawl a ngai tih hre reng ang che.