IAF kuta Lengpui Airport pek a tawp thlengin kan do dawn – MNF president
Mizoram sawrkarin Indian Air Force kuta Lengpui Airport hlan a tum chuan a tawp thlengin an do dawn tih MNF president Zoramthanga chuan a sawi.
Thawhlehni khan Mizo Hnam Runa MNF din champha vawi-63 lawmnaah Zoramthanga chuan, Lengpui Airport chu kan state nunna hnar, ramdang nen kan inpawhna a ni, tiin, ramri buai chungchang leh Covid avanga harsatna kan tawhte a sawi. “Silchar kawng a ping a, rel kawng a ping a, a buaithlak zia kan hre tawh. Chuvangin, airport hi midang kuta hlan a rem lo. NGO, political party, kohhran leh ngaihtuahna fim tak hmang phak thangtharte pawhin an remtih ka ring lo,” a ti.
Kum khat em pawh an sawrkar hmaa sum harsatna avanga sawrkar mek an buai tih a sawi a. Tun ang zela an kal chuan, rei an sawrkar a ring lo tih a sawi a ni.
MNF chu ‘Pathian leh kan ram tan’ tih thuthlung neia din a nih avangin, Mizoramah pawh party 30 chuang zuihral tawh karah Pathianin kum 63 an din champha a hruai thleng tih MNF president hian a sawi a. Zoram hmun hrang hranga awm MNF-te phur taka leh tha thlah loa, ram leh hnam tan theihtawp chhuah zel turin a chah.
MNF din champha lawmnaah hian martar-te pualin sunna hun hman a ni.