IASE-ah Learning Centre hawng

Institute of Advanced Studies in Education (IASE), Republic Venga New Age Learning Centre thar chu Zirtawpni khan Higher & Technical Education ,inister Dr Vanlalthlana’n a hawng a, semester opening programme a hmanpui nghal.
New Age Learning Centre hi ICT based library resource hmunpui a ni a. UD&PA department hnuaia Aizawl Smart City Ltd. bultuma din a ni.
Minister chuan Learning Centre changtlung tak zirna ina din a ni chu lawmawm a tih thu a sawi a. Khawvel changkang zelah thiamna leh resource neihte puntir ve zel a ngai a, zirlaite tana tangkai tak tur hmanraw tha leh changtlung awm chu zirlaiten hlawk taka an hman theih nan hma latu department chungah lawmthu a sawi a ni.
IASE semester opening programme-ah hian minister chuan Teacher Education Institute-a zirlai – B.Ed, M.Ed leh Ph.D te chu hmalam huna zirtirtu rintlak leh ram innghahna tur an ni, tiin, zirlai nih atangin zirtirtu tha, rinawm leh inpe mi ni tura rilru siam turin a fuih. Research institution a nih angin research project liantham lakluh kawngah theihtawp chhuah turin thawktute leh zirlaite a chah bawk.