ICU atangin Van der Sar chhuak tawh

Netherlands goal-keeper hlui Edwin van der Sar chu Croatia rama a chawlh hmanna hmunah thluaka thisen put avangin a tlu a, a zinna ram damdawi panpui a nih hnuah Dutch hospital ICU lama enkawl chhunzawm a ni a, tunah intensive care atangin a chhuak ta a, ward pangngaia a nupui nena an thlalak chu Twitter lamah a tar-chhuak tawh nghe nghe.
Manchester United leh Ajax player hlui hi tunah kum 52 mi niin, Twitter-a a thlakah a tarlan rualin, “Intensive care unit ka chhuah-san thei ta hi ka hlim a, hospital-ah la awm rih mah ila karleh lamte hi chuan in lama haw theih tawh ka inbeisei,” a ti.
July ni 7-a a dam loh thu hriat a nih rual khan Van der Sar hian khawvel hmun hrang hrang atangin dam leh thuai tura duhsakna a dawng mawlh mawlh a, chumi chung-changah chuan amah thlawpa ngaihventute lakah lawmthu a sawi nghal bawk.